shana-ba-shana

mujhe kuchh nahīñ ma.alūm kyā chāhtī ho tum mujh se

mere paas hai kyā jo maiñ de saktā huuñ kisī ko

tabl-o-alam hai paas apne na mulk-o-māl

aur phir koī bahut ḳhaas chiiz hī honī chāhiye tumheñ nazar karne ko to

kyā nahīñ hai tumhāre paas pahle se

husn aisā ki ḳhudā bhī ḳhush ho gayā hogā tumheñ banā kar

raunaq sī lag jaatī hai baiTh jaatī ho jahāñ

chaltī ho to saath chaleñ sarv-o-sanobar

uupar se paayā hai zehn-e-rasā

maiñ to azal se martā aayā huuñ husn aur dānish ke imtizāj par

mahz ḳhūb-sūrat aurat kabhī na lubhā sakī mujhe

na hī muta.assir kar sakī mujhe kam-shakl dānish-varī

maiñ aksar kahtā huuñ tum meñ ḳhudā ne jam.a kar diye haiñ chāñd aur sūraj

dāstānoñ se māvarā chande āftāb chande mahtāb koī hai to tum

aur phir tumhārī āvāz

pattharoñ ko pighlā dene vaalā gudāz hai is meñ

boltī ho to charāġh se jal uThte haiñ mahfil meñ

kyuuñ sharminda kartī ho ye kah kar mujhe ki tumheñ zarūrat hai merī

yaad aayā ek roz kahā thā tum ne

har kisī ko ek shāna chāhiye jis par sar rakh ke ro sake vo

aur fikr na ho ki mazāq uḌāyā jā.egā is kā yā banāyā jā.egā is baat kā batañgaḌ

lekin merī jaan aisā kaun sā dikh hai jo naubat aa ga.ī rone kī

kyā kahte haiñ ro.eñ tumhāre dushman

go maiñ tumhārā dushman nahīñ lekin maiñ jo huuñ rone ke liye

mere shāne par sar rakh kar roiiñ agar tum

to tumhāre aañsū na poñchh sakūñgā maiñ

maiñ to ḳhud bah jā.ūñgā āñsuoñ meñ

mujhe to is ḳhayāl hī se ronā aa rahā hai ki tumhārī āñkhoñ meñ bhare hoñ aañsū

tumheñ sach-much rotā dekh kar kyā haal hogā merā

haañ ek sūrat ho saktī hai albatta

tum ro lo mere shāne par sar rakh kar

aur maiñ ro luuñ tumhāre shāne par sar rakh kar

kyā ye mumkin hai

shāna-ba-shāna

mujhe kuchh nahin malum kya chahti ho tum mujh se

mere pas hai kya jo main de sakta hun kisi ko

tabl-o-alam hai pas apne na mulk-o-mal

aur phir koi bahut KHas chiz hi honi chahiye tumhein nazar karne ko to

kya nahin hai tumhaare pas pahle se

husn aisa ki KHuda bhi KHush ho gaya hoga tumhein bana kar

raunaq si lag jati hai baiTh jati ho jahan

chalti ho to sath chalen sarw-o-sanobar

upar se paya hai zehn-e-rasa

main to azal se marta aaya hun husn aur danish ke imtizaj par

mahz KHub-surat aurat kabhi na lubha saki mujhe

na hi mutassir kar saki mujhe kam-shakl danish-wari

main aksar kahta hun tum mein KHuda ne jama kar diye hain chand aur suraj

dastanon se mawara chande aaftab chande mahtab koi hai to tum

aur phir tumhaari aawaz

pattharon ko pighla dene wala gudaz hai is mein

bolti ho to charagh se jal uThte hain mahfil mein

kyun sharminda karti ho ye kah kar mujhe ki tumhein zarurat hai meri

yaad aaya ek roz kaha tha tum ne

har kisi ko ek shana chahiye jis par sar rakh ke ro sake wo

aur fikr na ho ki mazaq uDaya jaega is ka ya banaya jaega is baat ka batangaD

lekin meri jaan aisa kaun sa dikh hai jo naubat aa gai rone ki

kya kahte hain roen tumhaare dushman

go main tumhaara dushman nahin lekin main jo hun rone ke liye

mere shane par sar rakh kar roin agar tum

to tumhaare aansu na ponchh sakunga main

main to KHud bah jaunga aansuon mein

mujhe to is KHayal hi se rona aa raha hai ki tumhaari aankhon mein bhare hon aansu

tumhein sach-much rota dekh kar kya haal hoga mera

han ek surat ho sakti hai albatta

tum ro lo mere shane par sar rakh kar

aur main ro lun tumhaare shane par sar rakh kar

kya ye mumkin hai

shana-ba-shana