shayad ki bahaar aai

āh-e-dil-e-muztar kī tāsīr nazar aa.ī

kyā ḳhvāb-e-mohabbat kī ta.abīr nazar aa.ī

barbādī-e-insāñ kī tasvīr nazar aa.ī

tahzīb ke qur.ān kī tafsīr nazar aa.ī

shāyad ki bahār aa.ī

jāñbāz-e-mohabbat ko kyā husn kā manshā hai

jiine kī ijāzat hai marne kā ishārā hai

iz.hār-e-haqīqat par ta.azīr kā dhaḌkā hai

phir tauq nazar aaya zanjīr nazar aa.ī

phir joshish-e-vahshat ne kī silsila-jumbānī

phir vaqt kī maujeñ haiñ āmāda-e-tuġhyānī

phir husn ko sūjhī hai kyā mashq-e-sitam-rānī

nāzuk sī kalā.ī meñ shamshīr nazar aa.ī

tahzīb-o-tamaddun kā ulTā hai varaq 'qaisar'

hiltā hai dil-e-gītī larzāñ haiñ tabaq 'qaisar'

insāñ kā lahū piine phūlī hai shafaq qaisar

ab vaqt ke māthe kī tahrīr nazar aa.ī

shāyad ki bahār aa.ī

aah-e-dil-e-muztar ki tasir nazar aai

kya KHwab-e-mohabbat ki tabir nazar aai

barbaadi-e-insan ki taswir nazar aai

tahzib ke quran ki tafsir nazar aai

shayad ki bahaar aai

jaanbaz-e-mohabbat ko kya husn ka mansha hai

jine ki ijazat hai marne ka ishaara hai

izhaar-e-haqiqat par tazir ka dhaDka hai

phir tauq nazar aaya zanjir nazar aai

phir joshish-e-wahshat ne ki silsila-jumbani

phir waqt ki maujen hain aamada-e-tughyani

phir husn ko sujhi hai kya mashq-e-sitam-rani

nazuk si kalai mein shamshir nazar aai

tahzib-o-tamaddun ka ulTa hai waraq 'qaisar'

hilta hai dil-e-giti larzan hain tabaq 'qaisar'

insan ka lahu pine phuli hai shafaq qaisar

ab waqt ke mathe ki tahrir nazar aai

shayad ki bahaar aai