shab-e-aKHir

koī dastak musalsal hai kahīñ hai mustaqil aahaT

havā kā shor hai shāyad

kabhī mahsūs hotā hai sunahre ḳhushk pattoñ meñ se guzrā saañp kā joḌā

parinda koī sahmā hai

fazā meñ sarsarāhaT hai

mire andar bhaTaktī hai koī āvāz yā shāyad

bulātīñ haiñ mujhe us dam bichhaḌne vāloñ kī yādeñ

vo jin par zindagī ik ḳhauf kī sūrat musallat hai

kabhī ke haar ke yā zindagī se ruuTh baiThe jo

kabhī yuuñ lagtā hai jaise kisī tārīk bastī meñ

chalī āñdhī

qazā aa.ī

ajal shāyad mirī khiḌkī talak bistar talak aa.ī

sitāre Dūbne ko haiñ

añdherā bain kartā hai

ḳhudāyā niiñd kā ġhalba

diye kī lau bhaḌaktī hai

bujhā kar āḳhirī lamha

koi dastak musalsal hai kahin hai mustaqil aahaT

hawa ka shor hai shayad

kabhi mahsus hota hai sunahre KHushk patton mein se guzra sanp ka joDa

parinda koi sahma hai

faza mein sarsarahaT hai

mere andar bhaTakti hai koi aawaz ya shayad

bulatin hain mujhe us dam bichhaDne walon ki yaaden

wo jin par zindagi ek KHauf ki surat musallat hai

kabhi ke haar ke ya zindagi se ruTh baiThe jo

kabhi yun lagta hai jaise kisi tarik basti mein

chali aandhi

qaza aai

ajal shayad meri khiDki talak bistar talak aai

sitare Dubne ko hain

andhera bain karta hai

KHudaya nind ka ghalba

diye ki lau bhaDakti hai

bujha kar aaKHiri lamha