shab-e-naghma

aag uglī hai ki barsā.e haiñ phuul

jaam khankā.e haiñ kitne bāham

vajd meñ jism bhī hai ruuh bhī hai

aañkh ke saath machalte haiñ dil

rūh-e-mausīqī mushaḳhḳhas goyā

ḳhud muġhannī pe ġhinā kā hai gumāñ

dūdhiyā jism sunahrī poshāk

nūr-e-mahtāb se uThtā hai dhuāñ

phail jaatā hai fazāoñ meñ vahī

naġhma-o-lahn kī ḳhushbū ban kar

ḳhud hai maḳhmūr har āhang-o-adā

ḳhud tamāshā bhī tamāshā.ī hai

hai kisī kohna parī-zād kī ruuh

pa.e-gul-gasht jo aaj aa.ī hai

biis sadiyoñ se thī āsūda-e-ḳhvāb

jaagī hai naġhme kā jaadū ban kar

niim kā qalb nazāre se do-nīm

sāz-o-āvāz meñ sadiyoñ kā ḳhumār

naġhma-o-nūr se shab hai bedār

hama-tan-gosh hai zarra zarra

kaun hai jo hama-tan saaz nahīñ

kis jagah dost kī āvāz nahīñ

aag ugli hai ki barsae hain phul

jam khankae hain kitne baham

wajd mein jism bhi hai ruh bhi hai

aankh ke sath machalte hain dil

ruh-e-mausiqi mushaKHKHas goya

KHud mughanni pe ghina ka hai guman

dudhiya jism sunahri poshak

nur-e-mahtab se uThta hai dhuan

phail jata hai fazaon mein wahi

naghma-o-lahn ki KHushbu ban kar

KHud hai maKHmur har aahang-o-ada

KHud tamasha bhi tamashai hai

hai kisi kohna pari-zad ki ruh

pae-gul-gasht jo aaj aai hai

bis sadiyon se thi aasuda-e-KHwab

jagi hai naghme ka jadu ban kar

nim ka qalb nazare se do-nim

saz-o-awaz mein sadiyon ka KHumar

naghma-o-nur se shab hai bedar

hama-tan-gosh hai zarra zarra

kaun hai jo hama-tan saz nahin

kis jagah dost ki aawaz nahin