shab-e-tanhai

saañs roke hue is shahr se guzrī hai havā

kuchh to kahtī hai fazā raat ke dīvānoñ se

ḳhālī saḌkoñ pe bahut shor hai sannāTe kā

giit likkhe haiñ ḳhamoshī kī madhur tānoñ se

mere ahbāb mujhe kahte haiñ ai jān-e-azīz

tū yahāñ tanhā añdheroñ se ulajhtā kyā hai

shahr meñ saf sī bichhī hai bujhe añgāroñ par

tū faqat raakh ke ambār ko taktā kyā hai

aao ham mil ke manā.eñ shab-e-ḳhāmoshī ko

bujh gayā dil to huā kyā abhī bīnā.ī hai

ḳhālī nazroñ se takeñ TuuTe hue tāroñ ko

apne ḳhvāboñ pe pashemāñ shab-e-tanhā.ī hai

saañs roke hue is shahr se guzrī hai havā

sans roke hue is shahr se guzri hai hawa

kuchh to kahti hai faza raat ke diwanon se

KHali saDkon pe bahut shor hai sannaTe ka

git likkhe hain KHamoshi ki madhur tanon se

mere ahbab mujhe kahte hain ai jaan-e-aziz

tu yahan tanha andheron se ulajhta kya hai

shahr mein saf si bichhi hai bujhe angaron par

tu faqat rakh ke ambar ko takta kya hai

aao hum mil ke manaen shab-e-KHamoshi ko

bujh gaya dil to hua kya abhi binai hai

KHali nazron se taken TuTe hue taron ko

apne KHwabon pe pasheman shab-e-tanhai hai

sans roke hue is shahr se guzri hai hawa