shab ka safar

āḳhirash aa ga.ī vo shab ai dil

sub.h se intizār jis kā hai

merī tanhā.ī kī rafīq ye shab

kaun kahtā hai ki tārīk hai shab

mere har dard se paivand bane

ārzūoñ kī ik ridā aisī

jis kī zambīl meñ maiñ ne apne

dil jigar zehn bichhā rakkhe hoñ

apne ma.ashūq ke is āñchal meñ

kitne armān chhupā rakkhe haiñ

kitne ehsās sajā rakkhe haiñ

mere andar kā karb uThā.e ye shab

kahkashāñ ban ke jagmagātī hai

ruuh burrāq ban sī jaatī hai

jis pe baiThā maiñ apnī duniyā ke

āsmānoñ kī sair kartā huuñ

raat se sub.h ko utartā huuñ

sub.h hotī hai raat aane ko

raat ko intizār rahtā hai

merī tanhā.ī kī rafīq ye shab

merī jānāñ amiiq ye shab

reshmī asvadī atiiq ye shab

kaun kahtā hai ki tārīk hai shab

shab tirā intizār rahtā hai

aaKHirash aa gai wo shab ai dil

subh se intizar jis ka hai

meri tanhai ki rafiq ye shab

kaun kahta hai ki tarik hai shab

mere har dard se paiwand bane

aarzuon ki ek rida aisi

jis ki zambil mein main ne apne

dil jigar zehn bichha rakkhe hon

apne mashuq ke is aanchal mein

kitne arman chhupa rakkhe hain

kitne ehsas saja rakkhe hain

mere andar ka karb uThae ye shab

kahkashan ban ke jagmagati hai

ruh burraq ban si jati hai

jis pe baiTha main apni duniya ke

aasmanon ki sair karta hun

raat se subh ko utarta hun

subh hoti hai raat aane ko

raat ko intizar rahta hai

meri tanhai ki rafiq ye shab

meri jaanan amiq ye shab

reshmi aswadi atiq ye shab

kaun kahta hai ki tarik hai shab

shab tera intizar rahta hai