shab kaisi bhi ho shab se hamein pyar nahin hai

dil shab kī kisī shai kā parastār nahīñ hai

mahtāb se raushan ho ki tāroñ se bharī ho

shab kaisī bhī ho shab se hameñ pyaar nahīñ hai

taslīm ki TuuTā hai sutūn-e-dar-e-zulmat

taslīm ki sadiyoñ kā añdherā huā zaḳhmī

dhartī kī ragoñ se jo lahū chuus rahā thā

vo saañp vo azhdar vo saperā huā zaḳhmī

taslīm ki be-zor huī zulm kī āñdhī

taslīm kī sham'oñ kī laveñ tez huī haiñ

rāheñ ki dhuāñ-dhār thiiñ tārīkī-e-ġham se

ummīd kī kirnoñ se dil-āvez huī haiñ

taslīm ki is mauj-e-tajallī ke jilau meñ

jo kuchh bhī nigāhoñ kā taqāzā thā vo sab

ai dīda-varo phir bhī ye ehsās hai baaqī

shab kitnī hī zartāb ho pur-nūr ho shab hai

dil shab kī kisī shai kā parastār nahīñ hai

mahtāb se raushan ho ki tāroñ se bharī ho

shab kaisī bhī ho shab se hameñ pyaar nahīñ hai

dil shab ki kisi shai ka parastar nahin hai

mahtab se raushan ho ki taron se bhari ho

shab kaisi bhi ho shab se hamein pyar nahin hai

taslim ki TuTa hai sutun-e-dar-e-zulmat

taslim ki sadiyon ka andhera hua zaKHmi

dharti ki ragon se jo lahu chus raha tha

wo sanp wo azhdar wo sapera hua zaKHmi

taslim ki be-zor hui zulm ki aandhi

taslim ki sham'on ki lawen tez hui hain

rahen ki dhuan-dhaar thin tariki-e-gham se

ummid ki kirnon se dil-awez hui hain

taslim ki is mauj-e-tajalli ke jilau mein

jo kuchh bhi nigahon ka taqaza tha wo sab

ai dida-waro phir bhi ye ehsas hai baqi

shab kitni hi zartab ho pur-nur ho shab hai

dil shab ki kisi shai ka parastar nahin hai

mahtab se raushan ho ki taron se bhari ho

shab kaisi bhi ho shab se hamein pyar nahin hai