shab-KHun

jab ban siyāh raat ke tāroñ se bhar ga.e

kunj-e-chaman meñ chamke shagūfe na.e na.e

mujh ko havā ne baat sujhā.ī ajiib sī

bādal meñ ek shakl dikhā.ī ajiib sī

chāñd āsmāñ kī sej pe soyā huā milā

rañg-e-gul-e-anār meñ luthḌā huā milā

ai āshiqān-e-husn-e-azal ġhaur se suno

maiñ barg-e-be-navā to nahīñ huuñ ki chup rahūñ

dil ke kisī bhī shole ko uryāñ na kar sakūñ

maiñ teġh haath meñ liye sū-e-falak gayā

jazboñ ke ras se mahke hue chāñd tak gayā

kaafī thā ek vaar mirī teġh-e-tez kā

mahtāb ke badan se lahū phuuT kar bahā

jab ban siyah raat ke taron se bhar gae

kunj-e-chaman mein chamke shagufe nae nae

mujh ko hawa ne baat sujhai ajib si

baadal mein ek shakl dikhai ajib si

chand aasman ki sej pe soya hua mila

rang-e-gul-e-anar mein luthDa hua mila

ai aashiqan-e-husn-e-azal ghaur se suno

main barg-e-be-nawa to nahin hun ki chup rahun

dil ke kisi bhi shole ko uryan na kar sakun

main tegh hath mein liye su-e-falak gaya

jazbon ke ras se mahke hue chand tak gaya

kafi tha ek war meri tegh-e-tez ka

mahtab ke badan se lahu phuT kar baha