shab-pargi

zamīn gol agar hai to gol kyoñ hai ye

maiñ sochtī huuñ ise

mustatīl honā thā

zamīn chāñd se kyoñ is qadar hai duurī par

ise qarīb bahut hī qarīb honā thā

ye chāñd raat ko kyoñ narm raushnī kī kiran

bikhertā hai zamīñ ke siyāh chehre par

ise to garm shuā.eñ hī le ke aanā thā

salāḳh-e-garm kī mānind sho.ala-rū sūraj

zamīñ pe aag kī chādar bichhā ke chaltā hai

ise to chāñd ke paikar meñ Dhal ke aanā thā

banā hai aadmī rahm-o-karam kā putlā kyoñ

hai is sifat se use muttasif kiyā kis ne

darindagī hī se

gar intisāb ho is kā

kahāñ se aa.egā ilzām koī fitrat par

inhīñ ḳhayāloñ meñ rahtī hai mubtalā aksar

ye merī aql kī bechārgī

ki shab-pargī

zamin gol agar hai to gol kyon hai ye

main sochti hun ise

mustatil hona tha

zamin chand se kyon is qadar hai duri par

ise qarib bahut hi qarib hona tha

ye chand raat ko kyon narm raushni ki kiran

bikherta hai zamin ke siyah chehre par

ise to garm shuaen hi le ke aana tha

salaKH-e-garm ki manind shoala-ru suraj

zamin pe aag ki chadar bichha ke chalta hai

ise to chand ke paikar mein Dhal ke aana tha

bana hai aadmi rahm-o-karam ka putla kyon

hai is sifat se use muttasif kiya kis ne

darindagi hi se

gar intisab ho is ka

kahan se aaega ilzam koi fitrat par

inhin KHayalon mein rahti hai mubtala aksar

ye meri aql ki bechaargi

ki shab-pargi