shabnam

kyā ye taare haiñ zamīñ par jo utar aa.e haiñ

yā vo motī haiñ ki jo chāñd ne barsā.e haiñ

kyā vo hiire haiñ jo sahrā ne paḌe paa.e haiñ

na bahut duur pahuñch jaa.e mirī baat kahīñ

apne aañsū to nahīñ bhuul ga.ī raat kahīñ

ye kahānī bhī sunā.ī hai zamīñ ne aksar

kahkashāñ jaatī hai jab pichhle pahar apne ghar

pheñktī jaatī hai hañstī huī lākhoñ gauhar

aur har sub.h ko ye khel rachā jaatā hai

in ko ḳhurshīd kī palkoñ se chunā jaatā hai

ye bhī sunte haiñ ki ye saat samundar har roz

shafaq-e-shām kī kashtī meñ sajā kar har roz

nazr dete haiñ surayyā ko ye gauhar har roz

phir surayyā unheñ hañs hañs ke luTā detī hai

ḳhuub chuntī hai zamīñ aur duā detī hai

jis tarah baaġh ke phūloñ ko chaman pyārā hai

ban meñ jo khiltī haiñ kaliyāñ unheñ ban pyārā hai

yūñhī shabnam ko bhī apnā hī vatan pyārā hai

kahkashāñ roz bulā kar use bahkātī hai

par ye dāman meñ zamīñ ke hī sukūñ paatī hai

kya ye tare hain zamin par jo utar aae hain

ya wo moti hain ki jo chand ne barsae hain

kya wo hire hain jo sahra ne paDe pae hain

na bahut dur pahunch jae meri baat kahin

apne aansu to nahin bhul gai raat kahin

ye kahani bhi sunai hai zamin ne aksar

kahkashan jati hai jab pichhle pahar apne ghar

phenkti jati hai hansti hui lakhon gauhar

aur har subh ko ye khel racha jata hai

in ko KHurshid ki palkon se chuna jata hai

ye bhi sunte hain ki ye sat samundar har roz

shafaq-e-sham ki kashti mein saja kar har roz

nazr dete hain surayya ko ye gauhar har roz

phir surayya unhen hans hans ke luTa deti hai

KHub chunti hai zamin aur dua deti hai

jis tarah bagh ke phulon ko chaman pyara hai

ban mein jo khilti hain kaliyan unhen ban pyara hai

yunhi shabnam ko bhi apna hi watan pyara hai

kahkashan roz bula kar use bahkati hai

par ye daman mein zamin ke hi sukun pati hai