shaffafiyan(2)

abhī lañgar nahīñ Daalā

tikonī bādbāñ kī rassiyāñ Dhīlī nahīñ kiiñ

abhī mastūl apne paañv ke uupar khaḌā hai

safīne ke bhare siine meñ

sāñsoñ kā zaḳhīra sarsarātā hai

abhī ham nāqidāna fāsle se

ajnabī sāhil ke tevar dekhte haiñ

khujūroñ ke daraḳhtoñ meñ chhupī sargoshiyāñ sunñe kī ḳhātir

ham ne apne kaan zinda kar diye haiñ

pahāḌī meñ sarakte

tīr-andāzoñ ke kārobār pe āñkheñ lagā dī haiñ

hameñ

tum apne sāhil par

pazīrā.ī ke kis andāz ke qābil samajhte ho

ye tum par hai

agar tum tiir chhoḌoge

to ham ne apnī āñkhoñ ke sivā

saarā badan pighle hue lohe ke paanī meñ Duboyā hai

hamārā haath

tarkash ke khule muñh par dharā hai

kamāñ kī ḳhushk aur akḌī zabāñ to

muddatoñ se tiir chakhne ke liye bechain hai

tumheñ ye ilm honā chāhiye

ki ham jab apne tiir pe

dushman kī baa.eñ aañkh likhte haiñ

to baa.eñ aañkh hotī hai

kabhī abrū nahīñ hotā

ye tum par hai

agar tum ham ko siine se lagāne ke liye

sāhil pe aa kar apne baazū khol doge

to ham bhī

phaḌ.phaḌāte bādbāñ kī rassiyoñ ko khol deñge

agar tum tiir andāzoñ kī Tolī ko pahāḌī se utāroge

to ham bhī

jism se lipTā huā lohā girā deñge

tumhāre har amal ko ham

baḌī īmān-dārī se, baḌe insāf se radd-e-amal deñge

tumheñ ye ilm honā chāhiye

ki aañkh ke badle meñ aañkh

aur dil ke badle dil hamārā zābta hai

tumhārā husn-e-zan hai

soch ke har zāviye se sochnā

ki ham jo paanī par khaḌe haiñ

kis pazīrā.ī ke qābil haiñ

magar kuchh bhī karo

madd-e-nazar rakhnā ki ham madd-e-muqābil haiñ

abhi langar nahin Dala

tikoni baadban ki rassiyan Dhili nahin kin

abhi mastul apne panw ke upar khaDa hai

safine ke bhare sine mein

sanson ka zaKHira sarsaraata hai

abhi hum naqidana fasle se

ajnabi sahil ke tewar dekhte hain

khujuron ke daraKHton mein chhupi sargoshiyan sunne ki KHatir

hum ne apne kan zinda kar diye hain

pahaDi mein sarakte

tir-andazon ke karobar pe aankhen laga di hain

hamein

tum apne sahil par

pazirai ke kis andaz ke qabil samajhte ho

ye tum par hai

agar tum tir chhoDoge

to hum ne apni aankhon ke siwa

sara badan pighle hue lohe ke pani mein Duboya hai

hamara hath

tarkash ke khule munh par dhara hai

kaman ki KHushk aur akDi zaban to

muddaton se tir chakhne ke liye bechain hai

tumhein ye ilm hona chahiye

ki hum jab apne tir pe

dushman ki baen aankh likhte hain

to baen aankh hoti hai

kabhi abru nahin hota

ye tum par hai

agar tum hum ko sine se lagane ke liye

sahil pe aa kar apne bazu khol doge

to hum bhi

phaDphaDate baadban ki rassiyon ko khol denge

agar tum tir andazon ki Toli ko pahaDi se utaroge

to hum bhi

jism se lipTa hua loha gira denge

tumhaare har amal ko hum

baDi iman-dari se, baDe insaf se radd-e-amal denge

tumhein ye ilm hona chahiye

ki aankh ke badle mein aankh

aur dil ke badle dil hamara zabta hai

tumhaara husn-e-zan hai

soch ke har zawiye se sochna

ki hum jo pani par khaDe hain

kis pazirai ke qabil hain

magar kuchh bhi karo

madd-e-nazar rakhna ki hum madd-e-muqabil hain