shahar-e-yaran

āsmāñ kī god meñ dam toḌtā hai tifl-e-abr

jam rahā hai abr ke hoñToñ pe ḳhūñ-ālūd kaf

bujhte bujhte bujh ga.ī hai arsh ke hujroñ meñ aag

dhīre dhīre bichh rahī hai mātamī tāroñ kī saf

ai sabā shāyad tire ham-rāh ye ḳhūñ-nāk shaam

sar jhukā.e jā rahī hai shahr-e-yārāñ kī taraf

shahr-e-yārāñ jis meñ is dam DhūñDhtī phirtī hai maut

sher-dil bāñko meñ apne tīr-o-nashtar ke hadaf

ik taraf bajtī haiñ josh-e-zīst kī shahnā.iyāñ

ik taraf chiñghāḌte haiñ ahrman ke tabl-o-daf

jā ke kahnā ai sabā ba.ad-az-salām-e-dostī

aaj shab jis dam guzar ho shahr-e-yārāñ kī taraf

dasht-e-shab meñ is ghaḌī chup-chāp hai shāyad ravāñ

sāqī-e-sub.h-e-tarab naġhma-ba-lab sāġhar-ba-kaf

vo pahuñch jaa.e to hogī phir se barpā anjuman

aur tartīb-e-maqām-o-mansab-o-jāh-o-sharaf

aasman ki god mein dam toDta hai tifl-e-abr

jam raha hai abr ke honTon pe KHun-alud kaf

bujhte bujhte bujh gai hai arsh ke hujron mein aag

dhire dhire bichh rahi hai matami taron ki saf

ai saba shayad tere ham-rah ye KHun-nak sham

sar jhukae ja rahi hai shahr-e-yaran ki taraf

shahr-e-yaran jis mein is dam DhunDhti phirti hai maut

sher-dil banko mein apne tir-o-nashtar ke hadaf

ek taraf bajti hain josh-e-zist ki shahnaiyan

ek taraf chinghaDte hain ahrman ke tabl-o-daf

ja ke kahna ai saba baad-az-salam-e-dosti

aaj shab jis dam guzar ho shahr-e-yaran ki taraf

dasht-e-shab mein is ghaDi chup-chap hai shayad rawan

saqi-e-subh-e-tarab naghma-ba-lab saghar-ba-kaf

wo pahunch jae to hogi phir se barpa anjuman

aur tartib-e-maqam-o-mansab-o-jah-o-sharaf