shahr gum-sum

buildingeñ zīshān ūñchī

shāh-rāhoñ ke kināroñ par khaḌī thiiñ

shāhrāheñ aatī jaatī gāḌiyoñ caroñ se pur thiiñ

qahva-ḳhānoñ parkoñ galiyoñ mahloñ aur gharoñ meñ

zindagī ma.amūl kī raftār se chaltī thī lekin

bahr ke sāhil kī golā.ī se ham-āġhosh

mīloñ tak ye ābādī kā maskan

ik ḳhamoshī kī ridā oḌhe hue thā

guñg be-āvāz gum-sum

jaise logoñ kī zabāneñ kaT ga.ī hoñ

gāḌiyoñ kā shor saḌkoñ meñ hī dafnāyā gayā ho

bilDigoñ kī gahmā-gahmī

apnā dam sādhe hue pamba-dahan ho

sirf harakat ho magar lā-saut gūñgī

dūsrī jānib samundar

shor se ābād baḌhtā phailtā vāpas simaTtā

harkat-o-āvāz kā azalī namūna

shashdar-o-hairān sā

shorīda-sar pāgal havā se pūchhtā thā

shahr ko kyā ho gayā hai

aur phir jaise javāban

bahr kī lahroñ se Takrātī huī pāgal havā ne

koī jaadū kar diyā ho

aur sāhil par paḌe ḳhāmosh nāqūsoñ ke andar

bahr ke saare bilāloñ kī azāneñ phūñk dī hoñ

aur un ūñchī azānoñ ne lab-e-sāhil se uTh kar

shāh-rāhoñ qahva-ḳhānoñ parkoñ galiyoñ gharoñ kī ḳhāmushī ko

ik ulūhī saut kā malbūs sā pahnā diyā ho

aur yakāyak

shahr apnī quvvat-e-goyā.ī kī baḳhshish ko phir se pā gayā ho

buildingeñ zīshān haiñ ālī-nishāñ haiñ

gāḌiyāñ careñ Trāmeñ chal rahī haiñ

qahva-ḳhānoñ parkoñ galiyoñ gharoñ meñ

shor-o-ġhul hai zindagī hai

shahr ab jaagā huā hai

buildingen zishan unchi

shah-rahon ke kinaron par khaDi thin

shahrahen aati jati gaDiyon caron se pur thin

qahwa-KHanon parkon galiyon mahlon aur gharon mein

zindagi mamul ki raftar se chalti thi lekin

bahr ke sahil ki golai se ham-aghosh

milon tak ye aabaadi ka maskan

ek KHamoshi ki rida oDhe hue tha

gung be-awaz gum-sum

jaise logon ki zabanen kaT gai hon

gaDiyon ka shor saDkon mein hi dafnaya gaya ho

bilDigon ki gahma-gahmi

apna dam sadhe hue pamba-dahan ho

sirf harakat ho magar la-saut gungi

dusri jaanib samundar

shor se aabaad baDhta phailta wapas simaTta

harkat-o-awaz ka azali namuna

shashdar-o-hairan sa

shorida-sar pagal hawa se puchhta tha

shahr ko kya ho gaya hai

aur phir jaise jawaban

bahr ki lahron se Takraati hui pagal hawa ne

koi jadu kar diya ho

aur sahil par paDe KHamosh naquson ke andar

bahr ke sare bilalon ki azanen phunk di hon

aur un unchi azanon ne lab-e-sahil se uTh kar

shah-rahon qahwa-KHanon parkon galiyon gharon ki KHamushi ko

ek uluhi saut ka malbus sa pahna diya ho

aur yakayak

shahr apni quwwat-e-goyai ki baKHshish ko phir se pa gaya ho

buildingen zishan hain aali-nishan hain

gaDiyan caren Tramen chal rahi hain

qahwa-KHanon parkon galiyon gharon mein

shor-o-ghul hai zindagi hai

shahr ab jaga hua hai