shahr-e-ashob

vahī sadā jo mire ḳhuuñ meñ sarsarātī thī

vo saaya saaya hai ab har kisī kī āñkhoñ meñ

ye sarsarāhaTeñ sāñpoñ kī sīTiyoñ kī tarah

siyāhiyoñ ke samundar kī tah se mauj-ba-mauj

hamārī bikhrī safoñ kī taraf lapaktī haiñ

badan haiñ barf, rageñ rahguzār-e-reg-e-ravāñ

ka.ī to sahm ke chup ho ga.e haiñ sūrat-e-sañg

jo bach ga.e haiñ vo ik dūsre kī gardan par

jhapaT paḌe haiñ misāl-e-sagān-e-āvāra

havā guzartī hai sunsān siskiyoñ kī tarah

sadā-e-dard jo mere lahū meñ larzāñ thī

jhalak rahī hai vo ab be-shumār āñkhoñ meñ

laboñ pe suukh ga.ī harf-e-shauq kī shabnam

kisī meñ tāqat-e-guftār agar kahīñ hai bhī

to lafz aate haiñ hoñToñ pe hichkiyoñ kī tarah

tarāshiye to ka.ī pattharoñ ke sīnoñ meñ

shajar kī shāḳhoñ ke mānind naqsh phaile haiñ

par un ke reshoñ meñ zauq-e-numū nahīñ maltā

koī nafēr ki jis kī navā-e-hosh-navāz

diloñ se duur kare sarsarāhaToñ kā tilism

koī umiid kā paiġhām koī pyaar kā ism

vo ḳhvāb-e-parvarish-e-jāñ ki jis pe sadqe hoñ jism

wahi sada jo mere KHun mein sarsaraati thi

wo saya saya hai ab har kisi ki aankhon mein

ye sarsarahaTen sanpon ki siTiyon ki tarah

siyahiyon ke samundar ki tah se mauj-ba-mauj

hamari bikhri safon ki taraf lapakti hain

badan hain barf, ragen rahguzar-e-reg-e-rawan

kai to sahm ke chup ho gae hain surat-e-sang

jo bach gae hain wo ek dusre ki gardan par

jhapaT paDe hain misal-e-sagan-e-awara

hawa guzarti hai sunsan siskiyon ki tarah

sada-e-dard jo mere lahu mein larzan thi

jhalak rahi hai wo ab be-shumar aankhon mein

labon pe sukh gai harf-e-shauq ki shabnam

kisi mein taqat-e-guftar agar kahin hai bhi

to lafz aate hain honTon pe hichkiyon ki tarah

tarashiye to kai pattharon ke sinon mein

shajar ki shaKHon ke manind naqsh phaile hain

par un ke reshon mein zauq-e-numu nahin malta

koi nafeer ki jis ki nawa-e-hosh-nawaz

dilon se dur kare sarsarahaTon ka tilism

koi umid ka paigham koi pyar ka ism

wo KHwab-e-parwarish-e-jaan ki jis pe sadqe hon jism