shahr-e-bina ke log

dast-e-shafqat kaTā aur havā meñ muallaq huā

aañkh jhapkī to palkoñ pe Thahrī huī ḳhvāhisheñ dhuul meñ aT ga.iiñ

shahr-e-bīnā kī saḌkoñ pe nā-bīnā chalne lage

ek nādīda talvār dil meñ utarne lagī

paañv kī dhuul zanjīr ban kar chhanakne lagī aur qadam sabz-rū ḳhaak se ḳhauf khāne lage

zehn meñ ajnabī sarzamīñ ke ḳhayālāt aane lage

saare nā-bīnā ik dūsre kā sahārā bane

sar pe kāñToñ bharā taaj aur haath meñ motiye kī chhaḌī thaam kar

duur se aane vaalī sadā ke ta.āqub meñ yuuñ chal paḌe

jaise un kā masīhā isī samt ho

jaise un ke masīhā kī āñkhoñ meñ sirf un kī tasvīr ho

jaise un ke ḳhayāloñ meñ khiltī zamīñ un kī jāgīr ho

dast-e-shafqat kaTa aur hawa mein muallaq hua

aankh jhapki to palkon pe Thahri hui KHwahishen dhul mein aT gain

shahr-e-bina ki saDkon pe na-bina chalne lage

ek nadida talwar dil mein utarne lagi

panw ki dhul zanjir ban kar chhanakne lagi aur qadam sabz-ru KHak se KHauf khane lage

zehn mein ajnabi sarzamin ke KHayalat aane lage

sare na-bina ek dusre ka sahaara bane

sar pe kanTon bhara taj aur hath mein motiye ki chhaDi tham kar

dur se aane wali sada ke taaqub mein yun chal paDe

jaise un ka masiha isi samt ho

jaise un ke masiha ki aankhon mein sirf un ki taswir ho

jaise un ke KHayalon mein khilti zamin un ki jagir ho