shahr-e-nigaran

Hyderabad jise shahr-e-nigārāñ kahiye

rañg-e-rukHsār sahr-e-husn-e-bahārāñ kahiye

kisī shā.ir ke ḳhayāloñ kī hasīn duniyā hai

gul-ezāroñ kī ġhazāloñ kī hasīñ duniyā hai

us kī miTTī meñ mohabbat ke kañval khilte haiñ

zarre-zarre meñ dhaḌakte hue dil milte haiñ

us ke siine meñ qutub-shāh kā kirdār bhī hai

vaz.a-dārī bhī hai iḳhlās bhī hai pyaar bhī hai

us kī bāñhoñ meñ basī bhāg-matī kī duniyā

jagmagātā hai jahāñ chāñd ravā-dārī kā

masjideñ bhī haiñ manādir bhī haiñ girja-ghar bhī

nikhat-o-nūr meñ Duubā huā har manzar bhī

sub.h aatī hai masarrat ke payāmāt liye

zindagānī ke mahakte hue naġhmāt liye

shaam ke dosh pe lahrātā hai rañgīñ āñchal

shab kī āġhosh meñ khiltā hai gulistān-e-ġhazal

is liye 'mīr' kī 'ġhālib' kī ġhazal kahte haiñ

shahar ko mere sabhī tāj-mahal kahte haiñ

Hyderabad jise shahr-e-nigaran kahiye

rang-e-rukHsar sahr-e-husn-e-bahaaran kahiye

kisi shair ke KHayalon ki hasin duniya hai

gul-ezaron ki ghazalon ki hasin duniya hai

us ki miTTi mein mohabbat ke kanwal khilte hain

zarre-zarre mein dhaDakte hue dil milte hain

us ke sine mein qutub-shah ka kirdar bhi hai

waza-dari bhi hai iKHlas bhi hai pyar bhi hai

us ki banhon mein basi bhag-mati ki duniya

jagmagata hai jahan chand rawa-dari ka

masjiden bhi hain manadir bhi hain girja-ghar bhi

nikhat-o-nur mein Duba hua har manzar bhi

subh aati hai masarrat ke payamat liye

zindagani ke mahakte hue naghmat liye

sham ke dosh pe lahraata hai rangin aanchal

shab ki aaghosh mein khilta hai gulistan-e-ghazal

is liye 'mir' ki 'ghaalib' ki ghazal kahte hain

shahar ko mere sabhi taj-mahal kahte hain