shahr-e-tarik

raat kī zulf mo'attar na badan sho’la-fagan

sard āġhosh-e-fazā chāñd ke māthe pe thakan

koī ham-raqs koī saaz nahīñ pahlū meñ

sirf āvāz sulagtī hai mire kānoñ meñ

khiḌkiyāñ band kiye log siyah-ḳhānoñ meñ

rāhat-e-qalb ko DhūñDeñge in afsānoñ meñ

jin kī tahrīr meñ āġhāz se anjām talak

harf-dar-harf ubaltī hai aziyyat kī sharāb

guzre lamhoñ kā bhī rakhte haiñ jo uñglī pe hisāb

vo kisī ġhaar meñ dubke liye hāthoñ meñ kitāb

muntazir hoñge ki sūraj ke sharāre chamkeñ

taaki alfāz ke sīnoñ kī siyāhī pighle

koī zī-hosh agar hai to sañbhal kar nikle

shahr-e-tārīk meñ daanā kī chalī hai na chale

qurbateñ saañp kī DāḌhoñ se ziyāda mohlik

fāsle dhund meñ malbūs bhayānak chehre

zaḳhm har raah kī chhātī pe abhī haiñ gahre

raushnī qaid yahāñ aur nazar par pahre

rāh-rau saḳht añdheroñ ke siyah dāġhoñ ko

apne 'āriz ke pasīne se nahīñ dho saktā

ḳhuub is haal pe rotā maiñ agar ro saktā

lekin afsos ki aisā bhī nahīñ ho saktā

murda rūhoñ kā sukūñ lūTne vaalā Dhoñgī

barbat-e-aish-o-tarab chheḌ rahā hai dekho

sāmne ḳhauf kā aaseb khaḌā hai dekho

shahr-e-tārīk daraḳhtoñ pe Tañgā hai dekho

laakh chillā.e koī kar ke ab in rāhoñ meñ

koī darvāza khulegā na koī aa.egā

raat ki zulf mo'attar na badan sho’la-fagan

sard aaghosh-e-faza chand ke mathe pe thakan

koi ham-raqs koi saz nahin pahlu mein

sirf aawaz sulagti hai mere kanon mein

khiDkiyan band kiye log siyah-KHanon mein

rahat-e-qalb ko DhunDenge in afsanon mein

jin ki tahrir mein aaghaz se anjam talak

harf-dar-harf ubalti hai aziyyat ki sharab

guzre lamhon ka bhi rakhte hain jo ungli pe hisab

wo kisi ghaar mein dubke liye hathon mein kitab

muntazir honge ki suraj ke sharare chamken

taki alfaz ke sinon ki siyahi pighle

koi zi-hosh agar hai to sanbhal kar nikle

shahr-e-tarik mein dana ki chali hai na chale

qurbaten sanp ki DaDhon se ziyaada mohlik

fasle dhund mein malbus bhayanak chehre

zaKHm har rah ki chhati pe abhi hain gahre

raushni qaid yahan aur nazar par pahre

rah-rau saKHt andheron ke siyah daghon ko

apne 'ariz ke pasine se nahin dho sakta

KHub is haal pe rota main agar ro sakta

lekin afsos ki aisa bhi nahin ho sakta

murda ruhon ka sukun luTne wala Dhongi

barbat-e-aish-o-tarab chheD raha hai dekho

samne KHauf ka aaseb khaDa hai dekho

shahr-e-tarik daraKHton pe Tanga hai dekho

lakh chillae koi kar ke ab in rahon mein

koi darwaza khulega na koi aaega