shahr ke ek kushada ghar mein

shahr ke ek kushāda ghar meñ

apne apne kaam sambhāle

maiñ aur ek mirī tanhā.ī

ham donoñ mil kar rahte haiñ

bāteñ karte rote hañste

har dukh-sukh sahte rahte haiñ

aaj ki jab sūraj bhī nahīñ thā

phūloñ ke khilne kā ye mausam bhī nahīñ thā

aur falak par chāñd ke chhā jaane kā hafta biit chukā thā

darvāze kī ghanTī ne vo shor machāyā

jis se puurā ghar tharrāyā

ham donoñ hairān hue ki aisā raahī kaun rukā hai

jo is ghar ko apnā ghar hī samajh rahā hai

khiḌkī se bāhar jhāñkā to bas ik ḳhvāb sā manzar dekhā

sūraj bhī dahlīz pe thā

aur chāñd kivāḌ kī oT se lipTā jhāñk rahā thā

phuul khile the

ham ne is mehmān ko sar āñkhoñ pe biThāyā

dil meñ jagah dī

jo apne ham-rāh sabhī mausam le aayā

thakī huī tanhā.ī ne mujh se

thoḌī der ko mohlat māñgī

maiñ ne us ko chhuTTī de dī

saath meñ ye tākīd bhī kar dī

dekho kal tum apne kaam pe jaldī aanā

bhuul na jaanā

ye raahī jo saare mausam le aate haiñ

in ke raste saarī duniyā meñ jaate haiñ

jis āñgan meñ chalnā sīkheñ

us āñgan meñ ruk nahīñ paate

ruk jaa.eñ to thak jaate haiñ

shahr ke ek kushada ghar mein

apne apne kaam sambhaale

main aur ek meri tanhai

hum donon mil kar rahte hain

baaten karte rote hanste

har dukh-sukh sahte rahte hain

aaj ki jab suraj bhi nahin tha

phulon ke khilne ka ye mausam bhi nahin tha

aur falak par chand ke chha jaane ka hafta bit chuka tha

darwaze ki ghanTi ne wo shor machaya

jis se pura ghar tharraya

hum donon hairan hue ki aisa rahi kaun ruka hai

jo is ghar ko apna ghar hi samajh raha hai

khiDki se bahar jhanka to bas ek KHwab sa manzar dekha

suraj bhi dahliz pe tha

aur chand kiwaD ki oT se lipTa jhank raha tha

phul khile the

hum ne is mehman ko sar aankhon pe biThaya

dil mein jagah di

jo apne ham-rah sabhi mausam le aaya

thaki hui tanhai ne mujh se

thoDi der ko mohlat mangi

main ne us ko chhuTTi de di

sath mein ye takid bhi kar di

dekho kal tum apne kaam pe jaldi aana

bhul na jaana

ye rahi jo sare mausam le aate hain

in ke raste sari duniya mein jate hain

jis aangan mein chalna sikhen

us aangan mein ruk nahin pate

ruk jaen to thak jate hain