shahr-panah

ai ham-suḳhan

ḳhāmosh rah

aahaT na kar

ye raat hai

yā raat kā ik 'aks hai

hai raat kā dastūr ye

maqsūd ye manshūr ye

ho hū kā 'ālam bas yahāñ

is hū ke 'ālam meñ miyāñ

bas jaam kī āvāz ho

yā dil-nashīñ ham-rāz ho

paa.el ho mai ho saaz ho

az-bas-ki kyūñkar ho bayāñ

ye rang-o-roġhan kā samāñ

tāroñ kā jaise kārvāñ

harkat meñ saaqī hai kahāñ

bas jaam mahv-e-raqs hai

so ham-suḳhan

ḳhāmosh rah

aahaT na kar

ye raat hai

yā raat kā ik 'aks hai

is raat kī har baat meñ

aise kaThin hālāt meñ

jab saañs par pahre lageñ

hākim jahāñ bahre lageñ

munsif jahāñ ḳhanjar rahe

kyoñ soch na banjar rahe

golī jahāñ qānūn ho

har lab-kushā madfūn ho

aisī añdherī raat meñ

is markaz-e-zulmāt meñ

ik shaḳhs aisā bhī mile

jo sach ke raste pe chale

jo haq kare aise bayāñ

ho fajr kī jaise azaañ

ho raa'd kī jaise kaḌak

ho barq kī jaise chamak

phir yaar ke kūche se le kar

har sutūn-e-dār tak

har madrasa-o-mai-kada

har kūcha-o-bāzār tak

kuchh raushnī kā zikr ho

ḳhurshīd kī bhī fikr ho

jis raah thā sarmad chalā

thā 'faiz' ne jaise kahā

ik qāfila yūñhī chale

tārīk shab aise Dhale

aisā koī to shaḳhs ho

lekin kahāñ vo shaḳhs hai

pas ham-suḳhan

ḳhāmosh rah

aahaT na kar

ye raat hai

yā raat kā ik 'aks hai

ai ham-suKHan

KHamosh rah

aahaT na kar

ye raat hai

ya raat ka ek 'aks hai

hai raat ka dastur ye

maqsud ye manshur ye

ho hu ka 'alam bas yahan

is hu ke 'alam mein miyan

bas jam ki aawaz ho

ya dil-nashin ham-raaz ho

pael ho mai ho saz ho

az-bas-ki kyunkar ho bayan

ye rang-o-roghan ka saman

taron ka jaise karwan

harkat mein saqi hai kahan

bas jam mahw-e-raqs hai

so ham-suKHan

KHamosh rah

aahaT na kar

ye raat hai

ya raat ka ek 'aks hai

is raat ki har baat mein

aise kaThin haalat mein

jab sans par pahre lagen

hakim jahan bahre lagen

munsif jahan KHanjar rahe

kyon soch na banjar rahe

goli jahan qanun ho

har lab-kusha madfun ho

aisi andheri raat mein

is markaz-e-zulmat mein

ek shaKHs aisa bhi mile

jo sach ke raste pe chale

jo haq kare aise bayan

ho fajr ki jaise azan

ho ra'd ki jaise kaDak

ho barq ki jaise chamak

phir yar ke kuche se le kar

har sutun-e-dar tak

har madrasa-o-mai-kada

har kucha-o-bazar tak

kuchh raushni ka zikr ho

KHurshid ki bhi fikr ho

jis rah tha sarmad chala

tha 'faiz' ne jaise kaha

ek qafila yunhi chale

tarik shab aise Dhale

aisa koi to shaKHs ho

lekin kahan wo shaKHs hai

pas ham-suKHan

KHamosh rah

aahaT na kar

ye raat hai

ya raat ka ek 'aks hai