shaiKH salahuddin

ye sūjhī hai kyā aap ko shaiḳh sāhab

jo chup saadh lī aap ne shaiḳh sāhab

lapeTā thā nāsir jab jab muñh sochā maiñ ne

mohabbat hī kamzor thī aap kī jo nahīñ rok paa.ī use shaiḳh sāhab

sajīlā thā gul aap ke baaġh kā sab se vo shaiḳh sāhab

gayā vo ga.ī bazm-e-yārāñ kī raunaq ga.ī us kī ḳhushbū

tarannum se ḳhālī huī shā.irī guftugū meñ maza na rahā shaiḳh sāhab

mujhe ilm thā ki chhupāte haiñ ġham aap apnā

magar aap ko maiñ bahut saḳht-jān jāntā thā

bha.ī aql-e-kul māntā thā

kahā aap kā go nahīñ māntā thā

kahāñ to ye da.avā ki sau saal kī umr hogī hamārī

kahāñ ab yakāyak batā.e binā chal diye aap nāsir se milne

akele meñ dil aap kā bhī kahāñ lagtā hogā

kitābeñ ḳhvāh qur.ān hī kyuuñ na ho dostī kā badal to nahīñ shaiḳh sāhab

vafā ke taqāze kiye aap ne saare puure

mirī vāpsī ke rahe muntazir āḳhirī saañs tak aap to shaiḳh sāhab

na toḌā kabhī yaad kā mujh se rishta

dhar meñ jise mil na paayā kabhī rāsta vāpsī kā

bahut zor maarā ki maiñ lauT aa.uuñ

karūñ aa ke ābād vo bāġh-e-hikmat

chamakte the jis meñ misāl-e-mehr aap hī shaiḳh sāhab

masā.il ke jañgal meñ gum ho gayā maiñ

siyāsat ke kambal ko jitnā bhī maiñ chhoḌtā vo nahīñ chhoḌtā thā mujhe shaiḳh sāhab

mujhe ab chalā hai patā ki mohabbat na kamzor thī aap kī shaiḳh sāhab

bulāve pe nāsir ke yuuñ chal diye aap uTh kar

mohabbat thī kamzor merī

bulāte rahe aap barsoñ mujhe maiñ na aayā

bahut der kar dī hai aane meñ be-shak

magar ab meñ aayā ki aayā

zarā do ghaḌī intizār aur ġhālib se mil luuñ

bahut kuchh hai kahnā unheñ aap se shaiḳh sāhab

maiñ paiġhām le luuñ

sakīna se mariyam se anvar se ruḳhsat meñ ho luuñ

gale se ibrāhīm ko maiñ lagā luuñ

maiñ aayā ki aayā ḳhudā kī qasam shaiḳh sāhab

ye sujhi hai kya aap ko shaiKH sahab

jo chup sadh li aap ne shaiKH sahab

lapeTa tha nasir jab jab munh socha main ne

mohabbat hi kamzor thi aap ki jo nahin rok pai use shaiKH sahab

sajila tha gul aap ke bagh ka sab se wo shaiKH sahab

gaya wo gai bazm-e-yaran ki raunaq gai us ki KHushbu

tarannum se KHali hui shairi guftugu mein maza na raha shaiKH sahab

mujhe ilm tha ki chhupate hain gham aap apna

magar aap ko main bahut saKHt-jaan jaanta tha

bhai aql-e-kul manta tha

kaha aap ka go nahin manta tha

kahan to ye dawa ki sau sal ki umr hogi hamari

kahan ab yakayak batae bina chal diye aap nasir se milne

akele mein dil aap ka bhi kahan lagta hoga

kitaben KHwah quran hi kyun na ho dosti ka badal to nahin shaiKH sahab

wafa ke taqaze kiye aap ne sare pure

meri wapsi ke rahe muntazir aaKHiri sans tak aap to shaiKH sahab

na toDa kabhi yaad ka mujh se rishta

dhar mein jise mil na paya kabhi rasta wapsi ka

bahut zor mara ki main lauT aaun

karun aa ke aabaad wo bagh-e-hikmat

chamakte the jis mein misal-e-mehr aap hi shaiKH sahab

masail ke jangal mein gum ho gaya main

siyasat ke kambal ko jitna bhi main chhoDta wo nahin chhoDta tha mujhe shaiKH sahab

mujhe ab chala hai pata ki mohabbat na kamzor thi aap ki shaiKH sahab

bulawe pe nasir ke yun chal diye aap uTh kar

mohabbat thi kamzor meri

bulate rahe aap barson mujhe main na aaya

bahut der kar di hai aane mein be-shak

magar ab mein aaya ki aaya

zara do ghaDi intizar aur ghaalib se mil lun

bahut kuchh hai kahna unhen aap se shaiKH sahab

main paigham le lun

sakina se mariyam se anwar se ruKHsat mein ho lun

gale se ibrahim ko main laga lun

main aaya ki aaya KHuda ki qasam shaiKH sahab