shama

bazm-e-jahāñ meñ meñ bhī huuñ a sham-e-dardmand

faryād dar girah-e-sifat daana sipand

dī ishq ne harārat-e-soz-e-darūñ tujhe

aur gul-farosh ashk shafaq-gūñ kiyā mujhe

ho sham-e-bazm-e-aish ki sham-e-mazār-e-tū

har haal ashk-e-ġham se rahī ham-kanār tū

yak-bīñ tirī nazar sifat-e-āshiqān-e-rāz

merī nigāh māya-e-āshob-e-imtiyāz

ka.abe meñ but-kade meñ hai yaksāñ tirī ziyā

maiñ imtiyāz-e-dair-o-haram meñ phañsā huā

hai shān-e-āh kī tire dūd-e-siyāh meñ

poshīda koī dil hai tirī jalva-gāh meñ

jaltī hai tū ki barq-e-tajallī se duur hai

be-dard tere soz ko samjhe ki nuur hai

tū jal rahī hai aur tujhe kuchh ḳhabar nahīñ

biinā hai aur soz-e-darūñ par nazar nahīñ

meñ josh iztirāb se sīmāb vaar bhī

āgāh-e-iztirāb dil-e-be-qarār bhī

thā ye bhī koī naaz kisī be-niyāz kā

ehsās de diyā mujhe apne gudāz kā

ye āgahī marī mujhe rakhtī hai be-qarār

ḳhvābīda is sharar meñ haiñ ātish-kade hazār

ye imtiyāz-e-rif.at-o-pastī isī se hai

gul meñ mahak sharāb meñ mastī isī se hai

bustān-o-bulbul-o-gul-o-bū hai ye āgahī

asl kashākash-o-man-o-tū hai ye āgahī

sub.h-e-azal jo husn huā dilsitān-e-ishq

āvāz-e-kun huī tapish āmoz-e-jān-e-ishq

ye hukm thā ki gulshan-e-kun kī bahār dekh

ek aañkh le ke ḳhvāb-e-pareshāñ hazār dekh

mujh se ḳhabar na pūchh hijāb-e-vajūd kī

shām-e-firāq sub.h thī merī numūd kī

vo din ga.e ki qaid se maiñ āshnā na thā

zeb-e-daraḳht-e-tūr mirā āshiyāna thā

qaidī huuñ aur qafas ko chaman jāntā huuñ maiñ

ġhurbat ke ġham-kade ko vatan jāntā huuñ maiñ

yād-e-vatan fasurdagī be-sabab banī

shauq-e-nazar kabhī kabhī zauq-e-talab banī

a sham.a intihā-e-fareb-e-ḳhyāl dekh

masjūd sākinān-e-falak kā ma.aal dekh

mazmūñ firāq kā huuñ surayyā nishāñ huuñ maiñ

āhañg-e-taba nāzim-e-kaun-o-makāñ huuñ maiñ

bāñdhā mujhe jo us ne to chāhī mirī numūd

tahrīr kar diyā sar-e-dīvān-e-hast-o-būd

gauhar ko musht-e-ḳhāk maiñ rahnā pasand hai

bandish agarche sust hai mazmūñ buland hai

chashm-e-ġhalat nagar kā ye saarā qusūr hai

aalam zuhūr jalva-e-zauq-e-shu.ūr hai

ye silsila zamān-o-makāñ kā kamand hai

tauq-e-gulū-e-husn tamāshā-pasand hai

manzil kā ishtiyāq hai ġham-karda raah huuñ

a sham.a meñ asīr-e-fareb-e-nigāh huuñ

sayyād aap halqa-e-dām-e-sitam bhī aap

bām-e-haram bhī tā.ir-e-bām-e-haram bhī aap

maiñ husn huuñ ki ishq sarāpā gudāz huuñ

khultā nahīñ ki naaz huuñ maiñ yā niyāz huuñ

haañ āshnā-e-lab ho na rāz-e-kuhan kahīñ

phir chhiḌ na jaa.e qissa-e-dār-o-rasan kahīñ

bazm-e-jahan mein mein bhi hun a sham-e-dardmand

faryaad dar girah-e-sifat dana sipand

di ishq ne hararat-e-soz-e-darun tujhe

aur gul-farosh ashk shafaq-gun kiya mujhe

ho sham-e-bazm-e-aish ki sham-e-mazar-e-tu

har haal ashk-e-gham se rahi ham-kanar tu

yak-bin teri nazar sifat-e-ashiqan-e-raaz

meri nigah maya-e-ashob-e-imtiyaz

kabe mein but-kade mein hai yaksan teri ziya

main imtiyaz-e-dair-o-haram mein phansa hua

hai shan-e-ah ki tere dud-e-siyah mein

poshida koi dil hai teri jalwa-gah mein

jalti hai tu ki barq-e-tajalli se dur hai

be-dard tere soz ko samjhe ki nur hai

tu jal rahi hai aur tujhe kuchh KHabar nahin

bina hai aur soz-e-darun par nazar nahin

mein josh iztirab se simab war bhi

aagah-e-iztirab dil-e-be-qarar bhi

tha ye bhi koi naz kisi be-niyaz ka

ehsas de diya mujhe apne gudaz ka

ye aagahi mari mujhe rakhti hai be-qarar

KHwabida is sharar mein hain aatish-kade hazar

ye imtiyaz-e-rifat-o-pasti isi se hai

gul mein mahak sharab mein masti isi se hai

bustan-o-bulbul-o-gul-o-bu hai ye aagahi

asl kashakash-o-man-o-tu hai ye aagahi

subh-e-azal jo husn hua dilsitan-e-ishq

aawaz-e-kun hui tapish aamoz-e-jaan-e-ishq

ye hukm tha ki gulshan-e-kun ki bahaar dekh

ek aankh le ke KHwab-e-pareshan hazar dekh

mujh se KHabar na puchh hijab-e-wajud ki

sham-e-firaq subh thi meri numud ki

wo din gae ki qaid se main aashna na tha

zeb-e-daraKHt-e-tur mera aashiyana tha

qaidi hun aur qafas ko chaman jaanta hun main

ghurbat ke gham-kade ko watan jaanta hun main

yaad-e-watan fasurdagi be-sabab bani

shauq-e-nazar kabhi kabhi zauq-e-talab bani

a shama intiha-e-fareb-e-KHyal dekh

masjud sakinan-e-falak ka maal dekh

mazmun firaq ka hun surayya nishan hun main

aahang-e-taba nazim-e-kaun-o-makan hun main

bandha mujhe jo us ne to chahi meri numud

tahrir kar diya sar-e-diwan-e-hast-o-bud

gauhar ko musht-e-KHak main rahna pasand hai

bandish agarche sust hai mazmun buland hai

chashm-e-ghalat nagar ka ye sara qusur hai

aalam zuhur jalwa-e-zauq-e-shuur hai

ye silsila zaman-o-makan ka kamand hai

tauq-e-gulu-e-husn tamasha-pasand hai

manzil ka ishtiyaq hai gham-karda rah hun

a shama mein asir-e-fareb-e-nigah hun

sayyaad aap halqa-e-dam-e-sitam bhi aap

baam-e-haram bhi tair-e-baam-e-haram bhi aap

main husn hun ki ishq sarapa gudaz hun

khulta nahin ki naz hun main ya niyaz hun

han aashna-e-lab ho na raaz-e-kuhan kahin

phir chhiD na jae qissa-e-dar-o-rasan kahin