shams-e-tabrez

vo kitnā ḳhush-ḳhisāl thā

vo kitnā ḳhush-jamāl thā

jilau meñ apne jo liye thā

lamha-e-visāl thā

ye kā.enāt gā rahī thī

mast thī

ḳharāb thī

mahak meñ gul

lahak meñ sabza

nashshe meñ sharāb thī

ragoñ meñ us ke dajla thā

nigāh meñ furāt thā

vo chehra-e-sifāt thā

vo vajah-e-mumkināt thā

vo ek lamha sub.h thā

to lamha-e-digar

ġhurūb-e-āftāb thā

shafaq bharā ufuq

kabhī tulūa-e-māhtāb thā

vo dopahar thā

aadhī raat thā

anokhī koī baat thā

hazār dilbaroñ meñ taaq thā

misāl-e-be-misāl thā

vasūq-e-be-visāq thā

vo kaaf thā

vo nuun thā

binā-e-koh-e-qāf thā

vo shahd thā

nabāt thā

vo rūh-e-kā.enāt thā

bas ek aan

ek aan meñ

nazar se tā-jigar utar gayā

vo barq thā

vo ra.ad thā

vo tiir thā

kamān thā

yaqīn thā

gumān thā

vo sho.ala barq-e-tūr thā

vajūd se guzar gayā

vahī haiñ jism-o-dast-o-pā

vahī azal se tā-abad

zamāñ makāñ kā silsila

magar nahīñ

magar nahīñ

maiñ zinda huuñ

maiñ zinda huuñ

magar na harf-o-saut haiñ

na hiss-o-karb-e-jāñ-fazā

na zauq-e-ahraman-fagan

na shauq-e-shān-e-kibriyā

hai jism aaj bhī magar

vo dar nahīñ

vo sar nahīñ

ki soz-o-sāz ab koī

nahīñ hai sar-ba-sar nahīñ

wo kitna KHush-KHisal tha

wo kitna KHush-jamal tha

jilau mein apne jo liye tha

lamha-e-visal tha

ye kaenat ga rahi thi

mast thi

KHarab thi

mahak mein gul

lahak mein sabza

nashshe mein sharab thi

ragon mein us ke dajla tha

nigah mein furaat tha

wo chehra-e-sifat tha

wo wajah-e-mumkinat tha

wo ek lamha subh tha

to lamha-e-digar

ghurub-e-aftab tha

shafaq bhara ufuq

kabhi tulua-e-mahtab tha

wo dopahar tha

aadhi raat tha

anokhi koi baat tha

hazar dilbaron mein taq tha

misal-e-be-misal tha

wasuq-e-be-wisaq tha

wo kaf tha

wo nun tha

bina-e-koh-e-qaf tha

wo shahd tha

nabaat tha

wo ruh-e-kaenat tha

bas ek aan

ek aan mein

nazar se ta-jigar utar gaya

wo barq tha

wo rad tha

wo tir tha

kaman tha

yaqin tha

guman tha

wo shoala barq-e-tur tha

wajud se guzar gaya

wahi hain jism-o-dast-o-pa

wahi azal se ta-abad

zaman makan ka silsila

magar nahin

magar nahin

main zinda hun

main zinda hun

magar na harf-o-saut hain

na hiss-o-karb-e-jaan-faza

na zauq-e-ahraman-fagan

na shauq-e-shan-e-kibriya

hai jism aaj bhi magar

wo dar nahin

wo sar nahin

ki soz-o-saz ab koi

nahin hai sar-ba-sar nahin