شمس تبریز

وہ کتنا خوش خصال تھا

وہ کتنا خوش جمال تھا

جلو میں اپنے جو لیے تھا

لمحۂ وصال تھا

یہ کائنات گا رہی تھی

مست تھی

خراب تھی

مہک میں گل

لہک میں سبزہ

نشہ میں شراب تھی

رگوں میں اس کے دجلہ تھا

نگاہ میں فرات تھا

وہ چہرۂ صفات تھا

وہ وجہ ممکنات تھا

وہ ایک لمحہ صبح تھا

تو لمحۂ دگر

غروب آفتاب تھا

شفق بھرا افق

کبھی طلوع ماہتاب تھا

وہ دوپہر تھا

آدھی رات تھا

انوکھی کوئی بات تھا

ہزار دلبروں میں طاق تھا

مثال بے مثال تھا

وثوق بے وثاق تھا

وہ کاف تھا

وہ نون تھا

بنائے کوہ قاف تھا

وہ شہد تھا

نبات تھا

وہ روح کائنات تھا

بس ایک آن

ایک آن میں

نظر سے تا جگر اتر گیا

وہ برق تھا

وہ رعد تھا

وہ تیر تھا

کمان تھا

یقین تھا

گمان تھا

وہ شعلہ برق طور تھا

وجود سے گزر گیا

وہی ہیں جسم و دست و پا

وہی ازل سے تا ابد

زماں مکاں کا سلسلہ

مگر نہیں

مگر نہیں

میں زندہ ہوں

میں زندہ ہوں

مگر نہ حرف و صوت ہیں

نہ حس و کرب جاں فزا

نہ ذوق اہرمن فگن

نہ شوق شان کبریا

ہے جسم آج بھی مگر

وہ در نہیں

وہ سر نہیں

کہ سوز و ساز اب کوئی

نہیں ہے سر بہ سر نہیں