shanaKHt ka minar

bhūre rang ke kuttoñ kī haḌboñg ne

fazā par vahshat taarī kar dī hai

in kī bhuuk itnī shadīd hai

ki vo

sirf maḳhsūs qism kī haDDiyoñ kā guudā

sūñgh sūñgh kar talāsh rahe haiñ

ab to kaale kutte bhī

barsoñ kī niiñd se jaag uThe haiñ

aur vo bhī

in bhūre kuttoñ kī talāsh ke madad-gār ban rahe haiñ

māhaul par vahshat kī dhund chhā.ī huī hai

ye vahshat itnī ḳhaufnāk hai

ki

jañgalī darinde bhī apnī ḳhaslat bhuul ga.e haiñ

aur is dhund meñ

safed ḳhargosh

apnī baqā kī ḳhātir bhūre aur kaale kuttoñ kī haḌboñg

kī vahshat se

itne hirāsāñ ho rahe haiñ

ki

kahīñ kahīñ par vo apnī khaal kī rangat tak

chhupāne ke liye majbūr ho rahe haiñ

safed ḳhargoshoñ kā ek aur bhī mas.ala hai ki

vo kabhī kabhī apnī hī khaal ko

apne hī dāñtoñ se kutarne meñ lag jaate haiñ

jis kī vaj.h se

un kī shanāḳht kī pahchān

kuttoñ ke liye

āsān ho jaatī hai

lekin agar unheñ

apnī yaksāñ shanāḳht kā

ehsās ho jaa.e

to

ye bhūre aur kaale kutte

phir apnī bhuuk ko bhuul kar

apnī mashkūk shanāḳht ko bachāne

ke liye pareshāñ ho jā.eñge

lekin

kyā safed ḳhargosh kabhī

apnī shanāḳht kā mīnār ta.amīr kar pā.eñge

bhure rang ke kutton ki haDbong ne

faza par wahshat tari kar di hai

in ki bhuk itni shadid hai

ki wo

sirf maKHsus qism ki haDDiyon ka guda

sungh sungh kar talash rahe hain

ab to kale kutte bhi

barson ki nind se jag uThe hain

aur wo bhi

in bhure kutton ki talash ke madad-gar ban rahe hain

mahaul par wahshat ki dhund chhai hui hai

ye wahshat itni KHaufnak hai

ki

jangali darinde bhi apni KHaslat bhul gae hain

aur is dhund mein

safed KHargosh

apni baqa ki KHatir bhure aur kale kutton ki haDbong

ki wahshat se

itne hirasan ho rahe hain

ki

kahin kahin par wo apni khaal ki rangat tak

chhupane ke liye majbur ho rahe hain

safed KHargoshon ka ek aur bhi masala hai ki

wo kabhi kabhi apni hi khaal ko

apne hi danton se kutarne mein lag jate hain

jis ki wajh se

un ki shanaKHt ki pahchan

kutton ke liye

aasan ho jati hai

lekin agar unhen

apni yaksan shanaKHt ka

ehsas ho jae

to

ye bhure aur kale kutte

phir apni bhuk ko bhul kar

apni mashkuk shanaKHt ko bachane

ke liye pareshan ho jaenge

lekin

kya safed KHargosh kabhi

apni shanaKHt ka minar tamir kar paenge