شراب و ساقی

رند جب جھومتے ہیں نشے میں

اور صراحی بھی رقص کرتی ہے

کہتے ہیں ہوش کھو کے سب مے کش

رحمت حق یہاں برستی ہے

کوئی سنتا نہیں خرد کی بات

میکدے میں جنوں کی چلتی ہے

موسم گل ہو ابر باراں ہو

ایسی رت ہو تو پینی پڑتی ہے

بات ساقی سنا وہ جس سے ہمیں

زندگی کا شعور آ جائے

وجد کرنے لگیں سب اہل بزم

بے پیے ہی سرور آ جائے

زیست رقصاں ہے اب فضاؤں میں

گھل گئی ہے شراب کی بو باس

مے کشو کیا ستم ہے ایسے میں

میکدہ اس قدر اداس اداس

مے گلگوں پلا کے اے ساقی

تو مری تشنگی بڑھاتا ہے

میری نیت کبھی نہیں بھرتی

تو تو دل کھول کر پلاتا ہے

رند یہ کہہ رہا تھا واعظ سے

کون ہے مجھ کو روکنے والا

مے کشی چھوڑنا نہیں ممکن

کون ہے مجھ کو ٹوکنے والا

کچھ تو تلچھٹ سے بھی رہے محروم

کچھ کو حاصل ہے لطف ساغر کا

تو غلط بخش تو نہیں ساقی

کھیل سارا ہے یہ مقدر کا

زاہد بے ریا بنا ہے کوئی

اور بنا کوئی رند شاطر ہے

ہے تگ و دو جہاں میں جتنی بھی

صرف اک چیز ہی کی خاطر ہے