sharik-e-gham

bahut maġhrūr ho tum bhī

mohabbat ko samajhte ho

ki jaise dhuul paañv kī

ki jaise ḳhaak rāhoñ kī

magar jānāñ zarā socho

ruko lamhe ko aur dekho

kahīñ aisā na ho jaa.e

tumhārā dil badal jaa.e

satā.e yaad chāhat kī

ye aañsū rog ban jaa.eñ

tumheñ aur ham ko taḌpā.eñ

zarā Thahro mirī sun lo

ki maiñ tum ko samajhtī huuñ

zarā tum se ziyāda hī

mujhe parvā nahīñ apnī

nahīñ hai maslahat koī

kahīñ aisā na ho jaa.e

bahut sā vaqt bah jaa.e

aur aisā moḌ aa jaa.e

jahāñ se rāsta koī bhī

mujh tak tum ko na laa.e

mujhe afsos hai jānāñ

ki maiñ to huuñ hī āzurda

tumhārī muskurāhaT bhī

kahīñ aañsū na ban jaa.e

sharīk-e-ġham tumhārī huuñ

tumhārī ḳhair ḳhvāh bhī huuñ

yahīñ ruk jaao mat jaao

yahī tum se kahā thā naa?

magar tum ko to shāyad nit-na.e mausam bulāte the

na.e sur aur na.e gītoñ ke sangam gungunāte the

to phir tum ko ḳhamoshī kī zabāñ

mushkil thā samjhānā

ye dukh tum ko hī sahnā thā

to phir anjān ban jaanā

faqat ik ye hī rasta thā

jise ham ne sahal jaanā

magar tujh ko udāsī meñ yuuñ ab dekhā nahīñ jaatā

tirī ghāyal nazar kā sāmnā mujh se nahīñ hotā

bahut maghrur ho tum bhi

mohabbat ko samajhte ho

ki jaise dhul panw ki

ki jaise KHak rahon ki

magar jaanan zara socho

ruko lamhe ko aur dekho

kahin aisa na ho jae

tumhaara dil badal jae

satae yaad chahat ki

ye aansu rog ban jaen

tumhein aur hum ko taDpaen

zara Thahro meri sun lo

ki main tum ko samajhti hun

zara tum se ziyaada hi

mujhe parwa nahin apni

nahin hai maslahat koi

kahin aisa na ho jae

bahut sa waqt bah jae

aur aisa moD aa jae

jahan se rasta koi bhi

mujh tak tum ko na lae

mujhe afsos hai jaanan

ki main to hun hi aazurda

tumhaari muskurahaT bhi

kahin aansu na ban jae

sharik-e-gham tumhaari hun

tumhaari KHair KHwah bhi hun

yahin ruk jao mat jao

yahi tum se kaha tha na?

magar tum ko to shayad nit-nae mausam bulate the

nae sur aur nae giton ke sangam gungunate the

to phir tum ko KHamoshi ki zaban

mushkil tha samjhana

ye dukh tum ko hi sahna tha

to phir anjaan ban jaana

faqat ek ye hi rasta tha

jise hum ne sahal jaana

magar tujh ko udasi mein yun ab dekha nahin jata

teri ghayal nazar ka samna mujh se nahin hota