shattul-arab

ye surḳh dhāre qadīm vaqtoñ kī dāstānoñ ke surḳh-rāvī

kanār-e-āb-e-falak haiñ dastār banñe vaale naḳhīl-zāde

navāh-e-basra meñ phailtī bad-gumān sub.heñ

fazā meñ be-nām siskiyoñ kī shikasta-lahreñ

jinheñ munāfiq sifāratoñ ke hisār ne qatl kar diyā thā

yahīñ kahīñ haiñ

ye shahr-e-basara jahāñ pe fāras kī apsarā.eñ

qadīm ūñToñ kī jañg meñ kaam aa ga.ī thiiñ

ḳhilāfatoñ aur hijratoñ ke asiil shāhid

ye surḳh dhāre

ajab nahīñ ḳhāmushī kī tasbīh kartī rāteñ

kisī zamāne meñ chīḳh uTThīñ

ki kaise abbāsiyoñ ke ahd-e-muvāfaqat meñ

siyāh-sanjī ubal paḌe the

ġhulām-gardish kī dāstānoñ meñ raḳhna paḌnā kahāñ likhā thā

ye surḳh dhāre mo.arriḳhoñ kī tarāsh-karda

qabīh girheñ kabhī to kholeñge sach kī ḳhātir

ai ahal-e-basra ye e.atizāloñ kī dāstāneñ kahāñ likhī thiiñ

to vāsil-ibn-e-atā kī bāteñ jo razm-gāh-e-kalām-andar

chunī ga.ī thiiñ samā.atoñ ne kabhī sunī haiñ

to ahal-e-basra hasan jo basrī the jānte ho

muhāsba kī naved le kar tumhārī ḳhātir tumhārī miTTī pe aa ga.e the

tumheñ ḳhabar hai jab ahal-e-basra namāz paḌhnā hī bhuul baiThe

hasan jo basrī the yaañ kī shorish se duur jañgal meñ

tār-e-anfās ke tajallī se bahra-var the magar jo is roz

qahr TuuTā janāza-gah meñ the ahal-e-basra

koī nahīñ thā ḳhudā ke ghar meñ

to ahal-e-basra ye surḳh dhāre ḳhamosh the kyā

qadīm vaqtoñ ke surḳh-rāvī

batā ai shattul-arab ke paanī

yahāñ pe turkoñ ne kyā kiyā thā yahāñ valandezī kaise aa.e

tumhāre paanī ke ḳhār-o-ḳhas kī miThās thī yā

ḳhumār hairat kī god meñ mahv-e-istirāhat qadīm vaqtoñ kī dāstāneñ

tamām aalam ke surḳh dariyā ḳhamosh kyuuñ haiñ

mo.arriḳhoñ kī qabīh girheñ kabhī khuleñgī

ham apnī apnī sadāqatoñ meñ hī rahne vaale

barahna lamhoñ ke vārisoñ meñ se rah ga.e haiñ

ye surKH dhaare qadim waqton ki dastanon ke surKH-rawi

kanar-e-ab-e-falak hain dastar banne wale naKHil-zade

nawah-e-basra mein phailti bad-guman subhen

faza mein be-nam siskiyon ki shikasta-lahren

jinhen munafiq sifaraton ke hisar ne qatl kar diya tha

yahin kahin hain

ye shahr-e-basara jahan pe faras ki apsaraen

qadim unTon ki jang mein kaam aa gai thin

KHilafaton aur hijraton ke asil shahid

ye surKH dhaare

ajab nahin KHamushi ki tasbih karti raaten

kisi zamane mein chiKH uTThin

ki kaise abbasiyon ke ahd-e-muwafaqat mein

siyah-sanji ubal paDe the

ghulam-gardish ki dastanon mein raKHna paDna kahan likha tha

ye surKH dhaare moarriKHon ki tarash-karda

qabih girhen kabhi to kholenge sach ki KHatir

ai ahal-e-basra ye eatizalon ki dastanen kahan likhi thin

to wasil-ibn-e-ata ki baaten jo razm-gah-e-kalam-andar

chuni gai thin samaaton ne kabhi suni hain

to ahal-e-basra hasan jo basri the jaante ho

muhasba ki nawed le kar tumhaari KHatir tumhaari miTTi pe aa gae the

tumhein KHabar hai jab ahal-e-basra namaz paDhna hi bhul baiThe

hasan jo basri the yan ki shorish se dur jangal mein

tar-e-anfas ke tajalli se bahra-war the magar jo is roz

qahr TuTa janaza-gah mein the ahal-e-basra

koi nahin tha KHuda ke ghar mein

to ahal-e-basra ye surKH dhaare KHamosh the kya

qadim waqton ke surKH-rawi

bata ai shattul-arab ke pani

yahan pe turkon ne kya kiya tha yahan walandezi kaise aae

tumhaare pani ke KHar-o-KHas ki miThas thi ya

KHumar hairat ki god mein mahw-e-istirahat qadim waqton ki dastanen

tamam aalam ke surKH dariya KHamosh kyun hain

moarriKHon ki qabih girhen kabhi khulengi

hum apni apni sadaqaton mein hi rahne wale

barahna lamhon ke warison mein se rah gae hain