shauhar ki fariyaad

ai mirī begam na tū merī ḳhudī kamzor kar

ye sharīfoñ kā mohalla hai na itnā shor kar

shab ke pur-taskīn lamhoñ meñ na mujh ko bor kar

is sa.ādat-mand shauhar ko na yuuñ ignore kar

dīda-o-dil terī chāhat ke liye betāb haiñ

mujh se shauhar āj-kal bāzār meñ nāyāb haiñ

mere aane par hai pābandī kabhī jaane pe hai

hai kabhī piine pe qadġhan aur kabhī khāne pe hai

shaam tak ye bojh kitnā tere dīvāne pe hai

ek bachcha hai baġhal meñ dūsrā shāne pe hai

baiThtā hai mujh pe zālim donoñ ghuTne joḌ kar

ye tirā bachcha rahegā merī gardan toḌ kar

merī har ḳhvāhish pe to kahtī hai ho kar ḳhashmagīñ

achchhe shauhar is tarah kī zid kiyā karte nahīñ

to jo T.v mujh ko lā detī mirī raushan-jabīñ

maiñ koī pāgal huuñ phir bhī shaam ko jā.ūñ kahīñ

mujh ko har phandā gavārā hai ye daana bhī to ho

ghar meñ rahne ke liye koī bahāna bhī to ho

aaj kā shauhar jise karnā samajhtā hai harām

maiñ tire vo kaam bhī kartā huuñ mānind-e-ġhulām

mere zimme ghar kī zebā.ish kā saarā ehtimām

hai mirī tahvīl meñ tere kitchen tak kā nizām

aur ġham dene lage tū aur taḌpāne lage

tere bas meñ ho to bachche mujh se janvāne lage

kar na ThanDā sard-mehrī se mirā josh-e-talab

nāravā hai ye tashaddud nā-munāsib ye ġhazab

kis liye pāband kar rakkhā hai mujh ko be-sabab

tū ḳhudā ke vāste bas aaj jaane de club

taash khelūñgā na jī shatranj se bahlā.ūñgā

shab ke sāḌhe aaTh se pahle maiñ ghar aa jā.ūñgā

ai meri begam na tu meri KHudi kamzor kar

ye sharifon ka mohalla hai na itna shor kar

shab ke pur-taskin lamhon mein na mujh ko bor kar

is saadat-mand shauhar ko na yun ignore kar

dida-o-dil teri chahat ke liye betab hain

mujh se shauhar aaj-kal bazar mein nayab hain

mere aane par hai pabandi kabhi jaane pe hai

hai kabhi pine pe qadghan aur kabhi khane pe hai

sham tak ye bojh kitna tere diwane pe hai

ek bachcha hai baghal mein dusra shane pe hai

baiThta hai mujh pe zalim donon ghuTne joD kar

ye tera bachcha rahega meri gardan toD kar

meri har KHwahish pe to kahti hai ho kar KHashmagin

achchhe shauhar is tarah ki zid kiya karte nahin

to jo Tw mujh ko la deti meri raushan-jabin

main koi pagal hun phir bhi sham ko jaun kahin

mujh ko har phanda gawara hai ye dana bhi to ho

ghar mein rahne ke liye koi bahana bhi to ho

aaj ka shauhar jise karna samajhta hai haram

main tere wo kaam bhi karta hun manind-e-ghulam

mere zimme ghar ki zebaish ka sara ehtimam

hai meri tahwil mein tere kitchen tak ka nizam

aur gham dene lage tu aur taDpane lage

tere bas mein ho to bachche mujh se janwane lage

kar na ThanDa sard-mehri se mera josh-e-talab

narawa hai ye tashaddud na-munasib ye ghazab

kis liye paband kar rakkha hai mujh ko be-sabab

tu KHuda ke waste bas aaj jaane de club

tash khelunga na ji shatranj se bahlaunga

shab ke saDhe aaTh se pahle main ghar aa jaunga