shauq

shaam jab Dhaltī hai maiñ apne ḳharābe kī taraf

loTtā huuñ sar-nigūñ, bojhal qadam

baara ghanToñ kī mashaqqat aur thakan

baḌh ke le letī hai mujh ko god meñ

aur sail-e-tīrgī meñ Duub jaatī hai ummīd o shauq kī ik ik kiran

rahguzār-e-ārzū par chār-sū uḌtī hai dhuul

aur ik āvāz aatī hai kahīñ se

jo ki an-jānī bhī pahchānī bhī hai

zindagī kuchh bhī nahīñ, kuchh bhī nahīñ, kuchh bhī nahīñ

ik musalsal marg, ik sail-e-balā, nezoñ ke ban

āhoñ, karāhoñ ke sivā

phir isī tārīk lamhe, phir isī nāzuk ghaḌī

aarzū kī rahguzar par chand naqsh-e-pā ubharte haiñ sitāroñ kī tarah

lahlahātā hai koī āñchal bahāroñ kī tarah

phail jaatī hai kisī gesū kī nik.hat chār-sū

ek firdausī tabassum kī sunahrī chāñdnī

dhīme dhīme, ziina ziina

gungunātī, raqs farmātī huī

bām-e-ġham se ḳhāna-e-dil meñ utar kar

thapthapātī hai mujhe

giit gaatī hai, kabhī lorī sunātī hai mujhe

aur phir jab sub.h ko ḳhurshīd-e-ālam-tāb kī pahlī kiran

gudgudātī hai mujhe

kār-gāh-e-dahr meñ vāpas bulātī hai mujhe

aarzū o justujū dil meñ javāñ paatā huuñ maiñ

shauq kī mai ke nashe meñ chuur ho jaatā huuñ maiñ!!

sham jab Dhalti hai main apne KHarabe ki taraf

loTta hun sar-nigun, bojhal qadam

bara ghanTon ki mashaqqat aur thakan

baDh ke le leti hai mujh ko god mein

aur sail-e-tirgi mein Dub jati hai ummid o shauq ki ek ek kiran

rahguzar-e-arzu par chaar-su uDti hai dhul

aur ek aawaz aati hai kahin se

jo ki an-jaani bhi pahchani bhi hai

zindagi kuchh bhi nahin, kuchh bhi nahin, kuchh bhi nahin

ek musalsal marg, ek sail-e-bala, nezon ke ban

aahon, karahon ke siwa

phir isi tarik lamhe, phir isi nazuk ghaDi

aarzu ki rahguzar par chand naqsh-e-pa ubharte hain sitaron ki tarah

lahlahata hai koi aanchal bahaaron ki tarah

phail jati hai kisi gesu ki nikhat chaar-su

ek firdausi tabassum ki sunahri chandni

dhime dhime, zina zina

gungunati, raqs farmati hui

baam-e-gham se KHana-e-dil mein utar kar

thapthapati hai mujhe

git gati hai, kabhi lori sunati hai mujhe

aur phir jab subh ko KHurshid-e-alam-tab ki pahli kiran

gudgudati hai mujhe

kar-gah-e-dahr mein wapas bulati hai mujhe

aarzu o justuju dil mein jawan pata hun main

shauq ki mai ke nashe mein chur ho jata hun main!!