Shell Shocked

kaan ke paas se niklī golī

zehn ke andar Thahar ga.ī hai

kaan ke parde par ik chuuñ kā lambā parda paḌā huā hai

bachchoñ ke hañsne kī khan-khan

mausam ke pāzeb kī chhan-chhan

chīḳh ho koī yā phir siskī

is parde par hī hai ThiThkī

yā'nī koī lafz koī āvāz mere andar aa kar ab

DhūñDh nahīñ saktī apnī lai

mujh meñ kahīñ nahīñ ab vo shai

bam kā dhuāñ to bam phaTne ke kuchh hī der meñ havā havā thā

lekin us kī chamak aañkh par Thahrī huī hai

bīnā.ī pe jaise koī varaq chaḌhā hai chāñdī kā

sub.h sub.h koī phuul khile

yā der raat ek film chale

yā tum aa jaao shaam Dhale kuchh bhī dekh nahīñ saktā maiñ

mujh ko dekho

aur batāo

jiite hue lashkar ke sipāhī

aise kaise ho jaate haiñ?

kan ke pas se nikli goli

zehn ke andar Thahar gai hai

kan ke parde par ek chun ka lamba parda paDa hua hai

bachchon ke hansne ki khan-khan

mausam ke pazeb ki chhan-chhan

chiKH ho koi ya phir siski

is parde par hi hai ThiThki

ya'ni koi lafz koi aawaz mere andar aa kar ab

DhunDh nahin sakti apni lai

mujh mein kahin nahin ab wo shai

bam ka dhuan to bam phaTne ke kuchh hi der mein hawa hawa tha

lekin us ki chamak aankh par Thahri hui hai

binai pe jaise koi waraq chaDha hai chandi ka

subh subh koi phul khile

ya der raat ek film chale

ya tum aa jao sham Dhale kuchh bhi dekh nahin sakta main

mujh ko dekho

aur batao

jite hue lashkar ke sipahi

aise kaise ho jate hain?