sher-o-shaeri

sirf umda hasīn lafzoñ se

sher meñ dilkashī nahīñ aatī

gar na nikle vo dil se shā.ir ke

sher meñ zindagī nahīñ aatī

vo jo majnūñ haiñ duudh piine ke

un se to shā.erī nahīñ hotī

lailā-e-sher māñgtī hai ḳhuun

is se kam baat hī nahīñ hotī

zindagī ke hasīñ shabistāñ meñ

jin se dil ke charāġh jalte haiñ

dost āġhosh-e-shā.erī meñ vahī

ḳhūbsūrat ḳhayāl palte haiñ

be-niyāzī ko naaz hai jis par

hai vo aivān-e-nazm kā me.amār

DhūñDhtā hai jo apne fan kā sila

vo na hogā kabhī baḌā fankār

jis jagah āftāb jā na sake

pahuñche us jā ḳhayāl shā.ir kā

us kā ek ek lafz ho e.ajāz

hai to ye hai kamāl shā.ir kā

sher-e-nau ke imaam kahte haiñ

dar ḳhayālāt kā to band nahīñ

hamīñ deñge zabān ko vus.at

fan kī qaideñ hameñ pasand nahīñ

kahte haiñ ab nayā adab us ko

jis meñ mohmal sī baat kah jaa.eñ

sāhibān-e-mazāq bhī jis ko

sochte sochte hī rah jaa.eñ

jab mohabbat meñ Duub kar shā.ir

baat sab ke diloñ kī kahtā hai

parda-hā-e-dimāġh meñ vo sher

der tak gūñjtā hī rahtā hai

sirf umda hasin lafzon se

sher mein dilkashi nahin aati

gar na nikle wo dil se shair ke

sher mein zindagi nahin aati

wo jo majnun hain dudh pine ke

un se to shaeri nahin hoti

laila-e-sher mangti hai KHun

is se kam baat hi nahin hoti

zindagi ke hasin shabistan mein

jin se dil ke charagh jalte hain

dost aaghosh-e-shaeri mein wahi

KHubsurat KHayal palte hain

be-niyazi ko naz hai jis par

hai wo aiwan-e-nazm ka meamar

DhunDhta hai jo apne fan ka sila

wo na hoga kabhi baDa fankar

jis jagah aaftab ja na sake

pahunche us ja KHayal shair ka

us ka ek ek lafz ho eajaz

hai to ye hai kamal shair ka

sher-e-nau ke imam kahte hain

dar KHayalat ka to band nahin

hamin denge zaban ko wusat

fan ki qaiden hamein pasand nahin

kahte hain ab naya adab us ko

jis mein mohmal si baat kah jaen

sahiban-e-mazaq bhi jis ko

sochte sochte hi rah jaen

jab mohabbat mein Dub kar shair

baat sab ke dilon ki kahta hai

parda-ha-e-dimagh mein wo sher

der tak gunjta hi rahta hai