shiddat pasand

mujhe yaqīñ thā ki maz.haboñ se

koī bhī rishta nahīñ hai in kā

mujhe yaqīñ thā ki in kā maz.hab

hai nafratoñ kī hadoñ ke andar

mujhe yaqīñ thā vo lā-maz.hab haiñ

yā un ke maz.hab kā naam hargiz

sivā.e shiddat ke kuchh nahīñ hai

magar ai hamdam

yaqīñ tumhārā jo Dagmagāyā

to kitne insāñ jo ham-vatan the

jo ham-safar the

jo ham-nashīñ the

vo Thahre dushman

talāsh-e-dushman jo shart Thahrī

to bhuul baiThe

ki maz.haboñ se

koī bhī rishta nahīñ hai in kā

ki jis ko ta.ana diyā thā tum ne

ki us ke maz.hab kī kokh qātil ugal rahī hai

vo maañ ki jis kā javān beTā

tumhāre vahm-o-gumāñ kī āñdhī meñ gum huā hai

tumhāre badle kī aag jis ko nigal ga.ī hai

vo dekho ab tak bilak rahī hai

vo muntazir hai

koī to kāñdhe pe haath rakkhe

kahe ki ham ne bhī qātiloñ kī kahāniyoñ par

yaqīñ kiyā thā

kahe ki ham ne gunāh kiyā thā

kahe ki maañ ham ko muaaf kar do

kahe ki maañ ham ko muaaf kar do

mujhe yaqin tha ki mazhabon se

koi bhi rishta nahin hai in ka

mujhe yaqin tha ki in ka mazhab

hai nafraton ki hadon ke andar

mujhe yaqin tha wo la-mazhab hain

ya un ke mazhab ka nam hargiz

siwae shiddat ke kuchh nahin hai

magar ai hamdam

yaqin tumhaara jo Dagmagaya

to kitne insan jo ham-watan the

jo ham-safar the

jo ham-nashin the

wo Thahre dushman

talash-e-dushman jo shart Thahri

to bhul baiThe

ki mazhabon se

koi bhi rishta nahin hai in ka

ki jis ko tana diya tha tum ne

ki us ke mazhab ki kokh qatil ugal rahi hai

wo man ki jis ka jawan beTa

tumhaare wahm-o-guman ki aandhi mein gum hua hai

tumhaare badle ki aag jis ko nigal gai hai

wo dekho ab tak bilak rahi hai

wo muntazir hai

koi to kandhe pe hath rakkhe

kahe ki hum ne bhi qatilon ki kahaniyon par

yaqin kiya tha

kahe ki hum ne gunah kiya tha

kahe ki man hum ko muaf kar do

kahe ki man hum ko muaf kar do