shigaf jo zer-e-tamir hai

bahār ne hamārī taraf phuul pheñke

qabristān ne hamārī taraf ek qabr pheñkī

mujhe nahīñ mālūm ki phuul aur qabr

hamāre us shaḳhs ke haath kaise

lag ga.e jis shaḳhs ko ham abhī

taḳhtī par zindagī likhnā sikhā rahe the

jald-bāzoñ ne hameñ itnī bhī suhūlat

nahīñ dī ki ham ek maut kī vāzeh tasvīr banā paate

koī nahīñ jaan pā.egā ki kyoñ hamāre ghar

meñ ek frame baġhair kisī tasvīr ke hamesha

ke liye rakh diyā gayā hai

raat baḌbaḌā rahī hai aur ham apne siine par haath rakhe hue

baḌh rahe haiñ ek aisī āvāz kī taraf jo āvāz

shaam ke shor meñ hameñ puurī tarah sunā.ī nahīñ detī

aaj chāñd ko itnī tābnākī ke saath raat kī baḌbḌāhaT

kā saath nahīñ denā chāhiye thā

āñsūoñ kī ek qatār aaj parindoñ ke saath

sarhad ubuur kar jā.egī aur koī sipāhī

āñsūoñ kā passport check nahīñ karegā

ham dekh rahe haiñ ki ḳhuun kī ek dhaar

baisākhiyāñ thaam kar hamārī jānib baḌh rahī hai

aur kah rahī hai ki tum log itne zor se

apne dil ko patthar par kyoñ nahīñ paTaḳhte ki

tumhāre dil ke TukḌe bhī is bahār

meñ khilne vaale phūloñ meñ shumār ho jaa.eñ

ab ḳhuun kī dhaar ko kaun batā.e ki kyoñ ham

apne siine par haath rakh kar ek āvāz

kī taraf baḌhte chale rahe the

bahaar ne hamari taraf phul phenke

qabristan ne hamari taraf ek qabr phenki

mujhe nahin malum ki phul aur qabr

hamare us shaKHs ke hath kaise

lag gae jis shaKHs ko hum abhi

taKHti par zindagi likhna sikha rahe the

jald-bazon ne hamein itni bhi suhulat

nahin di ki hum ek maut ki wazeh taswir bana pate

koi nahin jaan paega ki kyon hamare ghar

mein ek frame baghair kisi taswir ke hamesha

ke liye rakh diya gaya hai

raat baDbaDa rahi hai aur hum apne sine par hath rakhe hue

baDh rahe hain ek aisi aawaz ki taraf jo aawaz

sham ke shor mein hamein puri tarah sunai nahin deti

aaj chand ko itni tabnaki ke sath raat ki baDbDahaT

ka sath nahin dena chahiye tha

aansuon ki ek qatar aaj parindon ke sath

sarhad ubur kar jaegi aur koi sipahi

aansuon ka passport check nahin karega

hum dekh rahe hain ki KHun ki ek dhaar

baisakhiyan tham kar hamari jaanib baDh rahi hai

aur kah rahi hai ki tum log itne zor se

apne dil ko patthar par kyon nahin paTaKHte ki

tumhaare dil ke TukDe bhi is bahaar

mein khilne wale phulon mein shumar ho jaen

ab KHun ki dhaar ko kaun batae ki kyon hum

apne sine par hath rakh kar ek aawaz

ki taraf baDhte chale rahe the