shishe ka karb

abhī to maiñ shaffāf shīsha huuñ ma.asūm huuñ be-riyā huuñ

koī rang mujh meñ nahīñ hai

koī ruup merā nahīñ hai

kiran jo bhī aa.egī mere badan tak

mire paar ho jā.egī be-mahābā

koī rang apnā maiñ us ko na dūñgā

abhī to maiñ be-rang-o-be-rūp huuñ be-riyā huuñ

abhī dukh sahūñgā

lahū zindagī kā maiñ bharūñgā

sharāroñ se kuchh ruup lūñgā

añdheroñ se kuchh dhuup lūñgā

abhī to zarā dostoñ kī mudārāt kar luuñ

zarā hādsoñ se mulāqāt kar luuñ

ki ālūda ho jā.ūñgā jab se sīmāb-e-ġham se

to ā.īna ban kar

tumhārī ināyāt lauTā ke vāpas tumhīñ ko

subuk-dosh ho jā.ūñgā maiñ

abhi to main shaffaf shisha hun masum hun be-riya hun

koi rang mujh mein nahin hai

koi rup mera nahin hai

kiran jo bhi aaegi mere badan tak

mere par ho jaegi be-mahaba

koi rang apna main us ko na dunga

abhi to main be-rang-o-be-rup hun be-riya hun

abhi dukh sahunga

lahu zindagi ka main bharunga

shararon se kuchh rup lunga

andheron se kuchh dhup lunga

abhi to zara doston ki mudaraat kar lun

zara hadson se mulaqat kar lun

ki aaluda ho jaunga jab se simab-e-gham se

to aaina ban kar

tumhaari inayat lauTa ke wapas tumhin ko

subuk-dosh ho jaunga main