shikayat

ḳhudāyā sab ko judā tū ne zindagī baḳhshī

kalī ko loch diyā phuul ko hañsī baḳhshī

jaḌe hazāroñ guhar kahkashāñ kī zulfoñ meñ

sahar ko nuur diyā shab ko chāñdnī baḳhshī

ru-pahlī sub.h ke lab ko atā kiye naġhme

sunahrī shaam ke hoñToñ ko bāñsurī baḳhshī

zamīñ pe ġhuncha-o-gul ko mahak ināyat kī

falak pe māh-o-surayyā ko raushnī baḳhshī

har ek zarra-e-sahrā ko dī jilā tū ne

har ek qatra-e-shabnam ko aarsī baḳhshī

tarā.iyoñ meñ maveshī charāne vāloñ ko

galā surīlā diyā raag rāgnī baḳhshī

kisān menD pe baiThe jo dhuup khāte haiñ

unheñ zamīn kī daulat harī-bharī baḳhshī

shabāb-o-husn kī sāġhar-ba-kaf hasīna ko

laboñ kī nāzukī zulfoñ kī barhamī baḳhshī

javāniyoñ kī hasīñ niim baaz āñkhoñ ko

sharāb thoḌī sī dī kuchh ġhunūdgī baḳhshī

jo mutriba ko atā kī sadā-e-dā.ūdī

to rind-e-mast ko mīnā-e-ahmarī baḳhshī

jo shā.iroñ pe suḳhan kī kitāb nāzil kī

to vā.izoñ ko zamīñ kī payambarī baḳhshī

vo jin kā jhuuT hai pesha fareb-e-maz.hab hai

tirī ḳhudā.ī ne un ko tavangarī baḳhshī

hazāroñ murtashiyoñ ko tirī mashiyyat ne

tilā.ī baḳht diyā ziist nuqra.ī baḳhshī

buland-o-surḳh makānoñ meñ rahne vāloñ ko

surūr-o-kaif ināyat kiyā ḳhushī baḳhshī

magar azal meñ ḳhatā kyā 'salām' ne kī thī

ki is ġharīb kī qismat ko muflisī baḳhshī

KHudaya sab ko juda tu ne zindagi baKHshi

kali ko loch diya phul ko hansi baKHshi

jaDe hazaron guhar kahkashan ki zulfon mein

sahar ko nur diya shab ko chandni baKHshi

ru-pahli subh ke lab ko ata kiye naghme

sunahri sham ke honTon ko bansuri baKHshi

zamin pe ghuncha-o-gul ko mahak inayat ki

falak pe mah-o-surayya ko raushni baKHshi

har ek zarra-e-sahra ko di jila tu ne

har ek qatra-e-shabnam ko aarsi baKHshi

taraiyon mein maweshi charane walon ko

gala surila diya rag ragni baKHshi

kisan meinD pe baiThe jo dhup khate hain

unhen zamin ki daulat hari-bhari baKHshi

shabab-o-husn ki saghar-ba-kaf hasina ko

labon ki nazuki zulfon ki barhami baKHshi

jawaniyon ki hasin nim baz aankhon ko

sharab thoDi si di kuchh ghunudgi baKHshi

jo mutriba ko ata ki sada-e-daudi

to rind-e-mast ko mina-e-ahmari baKHshi

jo shairon pe suKHan ki kitab nazil ki

to waizon ko zamin ki payambari baKHshi

wo jin ka jhuT hai pesha fareb-e-mazhab hai

teri KHudai ne un ko tawangari baKHshi

hazaron murtashiyon ko teri mashiyyat ne

tilai baKHt diya zist nuqrai baKHshi

buland-o-surKH makanon mein rahne walon ko

surur-o-kaif inayat kiya KHushi baKHshi

magar azal mein KHata kya 'salam' ne ki thi

ki is gharib ki qismat ko muflisi baKHshi