shikayat

maiñ us vaqt kitne baras kī thī ab yaad aatā nahīñ

baras tiin samjho ki chaar

magar maiñ ye achchhī tarah jāntī huuñ maiñ ḳhush thī

aur ḳhair se

maiñ janam aur maran se to nā-āshnā thī

maiñ hañs-khel kar zindagī jī rahī thī

akele akele se ik dost taarā ke saath

taarā taarā faqat ek taarā na thā

vo bhaa.ī thā aur khelā kartā thā jo saath mere

ham ne mil-jul kar hī us kī ḳhud chalne vaalī

na.ī car kā purza purza sabhī khol kar dekh Daalā

udhar apnī tashvīsh bāham ye sab jānñe kī

mirī ḳhūbsūrat vo guḌiyā

apnī jādū-bharī niilī āñkhoñ ko jhaT kholtī

band kartī thī ho jaatī andhī

angrezī abjad bhī maiñ ne usī dost ke saath daryāft kī thī

riyāzī samajhne kī kulfat bhī bardāsht kī thī

achānak mirī zindagī meñ jo ek aise tūfān ne aa ke maarā

vo nanhā aur adh-khilā phuul maslā gayā

maiñ kho baiThī khel aur kuud kā ek sāthī

vo taarā mujhe chhoḌ kar chal diyā duur jaane kahāñ

jānñā chāhā maiñ ne ki ye kyā huā

merā sāthī akelā mujhe chhoḌ kar haa.e kyoñ chal diyā

javāb aaya vo thā ḳhudā ko bahut hī pyārā

pyāre ḳhudā ye hai insāf kaisā

ki maiñ bhī to bhaa.ī se kartī thī pyaar

chāhtī thī usī ke saath rahnā

abhī tak vo bāteñ haiñ jo apnī daryāft meñ haif aa.ī nahīñ haiñ

aur aise raste bhī haiñ justujū jin kī baaqī abhī rah ga.ī hai

pyāre ḳhudā tum ġharaz-mand nikle

faqat apne baare meñ sochā hamārā na aaya tumheñ kuchh ḳhayāl

ai ḳhudā

tum ne ḳhvāboñ umīdoñ tamannāoñ ko hī hamārī masal Daalā hai

tum ne mujh se mirā ek hissa judā kar liyā hai

maiñ is ke liye tum ko ab chāhūñ karnā muaaf

magar ye batā de ki kaise batā de ki kaise

main us waqt kitne baras ki thi ab yaad aata nahin

baras tin samjho ki chaar

magar main ye achchhi tarah jaanti hun main KHush thi

aur KHair se

main janam aur maran se to na-ashna thi

main hans-khel kar zindagi ji rahi thi

akele akele se ek dost tara ke sath

tara tara faqat ek tara na tha

wo bhai tha aur khela karta tha jo sath mere

hum ne mil-jul kar hi us ki KHud chalne wali

nai car ka purza purza sabhi khol kar dekh Dala

udhar apni tashwish baham ye sab jaanne ki

meri KHubsurat wo guDiya

apni jadu-bhari nili aankhon ko jhaT kholti

band karti thi ho jati andhi

angrezi abjad bhi main ne usi dost ke sath daryaft ki thi

riyazi samajhne ki kulfat bhi bardasht ki thi

achanak meri zindagi mein jo ek aise tufan ne aa ke mara

wo nanha aur adh-khila phul masla gaya

main kho baiThi khel aur kud ka ek sathi

wo tara mujhe chhoD kar chal diya dur jaane kahan

jaanna chaha main ne ki ye kya hua

mera sathi akela mujhe chhoD kar hae kyon chal diya

jawab aaya wo tha KHuda ko bahut hi pyara

pyare KHuda ye hai insaf kaisa

ki main bhi to bhai se karti thi pyar

chahti thi usi ke sath rahna

abhi tak wo baaten hain jo apni daryaft mein haif aai nahin hain

aur aise raste bhi hain justuju jin ki baqi abhi rah gai hai

pyare KHuda tum gharaz-mand nikle

faqat apne bare mein socha hamara na aaya tumhein kuchh KHayal

ai KHuda

tum ne KHwabon umidon tamannaon ko hi hamari masal Dala hai

tum ne mujh se mera ek hissa juda kar liya hai

main is ke liye tum ko ab chahun karna muaf

magar ye bata de ki kaise bata de ki kaise