shikast-e-ana

aaj kī raat bahut sard bahut kaalī hai

tīrgī aise lipaTtī hai havā-e-ġham se

apne bichhḌe hue sājan se milī hai jaise

mish.al-e-ḳhvāb kuchh is taur bujhī hai jaise

dard ne jāgtī āñkhoñ kī chamak khā lī hai

shauq kā naam na ḳhvāhish kā nishāñ hai koī

barf kī sil ne mire dil kī jagah pā lī hai

ab dhundalke bhī nahīñ zīnat-e-chashm-e-be-ḳhvāb

aas kā rūp-mahl dast-e-tahī hai jaise

bahr-e-imkān pe kaa.ī sī jamī hai jaise

aise lagtā hai ki jaise mirā ma.amūra-e-jāñ

kisī sailāb-zada ghar kī zabūñ-hālī hai

na koī dost na taarā ki jise batlā.ūñ

is tarah TuuT ke bikhrā hai anā kā shīsha

merā pindār mire dil ke liye gaalī hai

nabz tāroñ kī tarah Duub rahī hai jaise!

ġham kī pinhā.ī samundar se baḌī hai jaise!

aañkh sahrāoñ ke dāman kī tarah ḳhālī hai

vahshat-e-jāñ kī taraf dekh ke yuuñ lagtā hai

maut is tarah ke jiine se bhalī hai jaise

tīrgī chhaTne lagī, vaqt rukegā kyūñ-kar

sub.h-e-ḳhurshīd liye dar pe khaḌī hai jaise

dāġh-e-rusvā.ī chhupāne se nahīñ chhup saktā

ye to yuuñ hai ki jabīñ bol rahī hai jaise!

aaj ki raat bahut sard bahut kali hai

tirgi aise lipaTti hai hawa-e-gham se

apne bichhDe hue sajan se mili hai jaise

mishal-e-KHwab kuchh is taur bujhi hai jaise

dard ne jagti aankhon ki chamak kha li hai

shauq ka nam na KHwahish ka nishan hai koi

barf ki sil ne mere dil ki jagah pa li hai

ab dhundalke bhi nahin zinat-e-chashm-e-be-KHwab

aas ka rup-mahl dast-e-tahi hai jaise

bahr-e-imkan pe kai si jami hai jaise

aise lagta hai ki jaise mera mamura-e-jaan

kisi sailab-zada ghar ki zabun-haali hai

na koi dost na tara ki jise batlaun

is tarah TuT ke bikhra hai ana ka shisha

mera pindar mere dil ke liye gali hai

nabz taron ki tarah Dub rahi hai jaise!

gham ki pinhai samundar se baDi hai jaise!

aankh sahraon ke daman ki tarah KHali hai

wahshat-e-jaan ki taraf dekh ke yun lagta hai

maut is tarah ke jine se bhali hai jaise

tirgi chhaTne lagi, waqt rukega kyun-kar

subh-e-KHurshid liye dar pe khaDi hai jaise

dagh-e-ruswai chhupane se nahin chhup sakta

ye to yun hai ki jabin bol rahi hai jaise!