shikast-e-badan

udaas sī thī vo shaam kitnī

ki us kī taaza lahad pe jis dam

ba-chashm-e-nam maiñ khaḌā huā thā

babūl-e-kohna kī pattiyoñ meñ

ik TimTimātā huā sitāra

na jaane kaise Thahar gayā thā

dhaḌakte dil se

maiñ sochtā thā

thī kaisī nāzuk vo merī sāthī

mizāj kitnā thā us kā ūñchā

ki jāma-zebī thī ḳhatm us par

mudām ḳhushbū meñ mahkī rahtī

vo aaj lekin

qazā kī zad par

paḌī huī hai ḳhamosh kaise

hazār-hā kankaroñ ke nīche

kise ḳhabar hai ki hashr kyā hai

badan kā us ke

badan jo sīmīñ thā

marmarīñ thā

udas si thi wo sham kitni

ki us ki taza lahad pe jis dam

ba-chashm-e-nam main khaDa hua tha

babul-e-kohna ki pattiyon mein

ek TimTimata hua sitara

na jaane kaise Thahar gaya tha

dhaDakte dil se

main sochta tha

thi kaisi nazuk wo meri sathi

mizaj kitna tha us ka uncha

ki jama-zebi thi KHatm us par

mudam KHushbu mein mahki rahti

wo aaj lekin

qaza ki zad par

paDi hui hai KHamosh kaise

hazar-ha kankaron ke niche

kise KHabar hai ki hashr kya hai

badan ka us ke

badan jo simin tha

marmarin tha