shikast-e-husn

kho.e hue haiñ sar ko jhukā.e hue haiñ aap

jaise ki bār-e-ishq uThā.e hue haiñ aap

dil meñ kasak nigah meñ jhijak tan meñ irti.āsh

rangīniyoñ meñ aaj nahā.e hue haiñ aap

buuTā sā qad vo bholī sī sūrat badan gudāz

uf kitnī dil-farebī chhupā.e hue haiñ aap

rangīnī-e-jahāñ meñ ulajhtī nahīñ nigāh

allāh kis ko apnā banā.e hue haiñ aap

kis ko talāsh kartī hai bhaTkī huī nigāh

kis par sukūn-e-qalb luTā.e hue haiñ aap

ye kis kī yaad siine meñ letī hai chuTkiyāñ

ye kis kī dhun meñ ḳhud ko bhulā.e hue haiñ aap

kis ke liye ye āñkhoñ meñ aañsū jigar meñ dard

kis kā ḳhayāl dil se lagā.e hue haiñ aap

aañsū ke kāñpte hue qatre meñ kaun hai

sahmī nazar meñ kis ko chhupā.e hue haiñ aap

kis ke bhare haiñ rang ye qaus-e-hayāt meñ

kis ko nafas nafas meñ chhupā.e hue haiñ aap

kyā mil ga.iiñ 'habīb' se āñkheñ ḳhatā muaaf

jaise shikast ishq se khaa.e hue haiñ aap

khoe hue hain sar ko jhukae hue hain aap

jaise ki bar-e-ishq uThae hue hain aap

dil mein kasak nigah mein jhijak tan mein irtiash

ranginiyon mein aaj nahae hue hain aap

buTa sa qad wo bholi si surat badan gudaz

uf kitni dil-farebi chhupae hue hain aap

rangini-e-jahan mein ulajhti nahin nigah

allah kis ko apna banae hue hain aap

kis ko talash karti hai bhaTki hui nigah

kis par sukun-e-qalb luTae hue hain aap

ye kis ki yaad sine mein leti hai chuTkiyan

ye kis ki dhun mein KHud ko bhulae hue hain aap

kis ke liye ye aankhon mein aansu jigar mein dard

kis ka KHayal dil se lagae hue hain aap

aansu ke kanpte hue qatre mein kaun hai

sahmi nazar mein kis ko chhupae hue hain aap

kis ke bhare hain rang ye qaus-e-hayat mein

kis ko nafas nafas mein chhupae hue hain aap

kya mil gain 'habib' se aankhen KHata muaf

jaise shikast ishq se khae hue hain aap