shikast-e-jam

gir gayā ye duudh kā paimāna mere haath se

ho ga.ī ik laġhzish-e-mastāna mere haath se

yuuñ zamīñ par jā girā hāthoñ se mere chhūT kar

gir paḌe gardūñ se jaise koī taarā TuuT kar

ġhash use aayā kuchh aisā khā ke chakkar gir paḌā

haath se mai-ḳhvār ke kyuuñ aaj sāġhar gir paḌā

shāḳh-e-gul se farsh par bulbul taḌap kar gir ga.ī

ye girā nīche ki mujh se chashm-e-sāqī phir ga.ī

jis tarah siine ke andar qalb-e-muztar be-qarār

ho gayā hāthoñ meñ mere ye bhī aa kar be-qarār

mere baa.is apnī qismat ko ye āḳhir ro gayā

aa.ī ik āvāz jhan sī aur ThanDā ho gayā

us ke girne se yahāñ ik choT dil par aa ga.ī

jo mujhe kuchh kah ga.ī batlā ga.ī sikhlā ga.ī

ya.anī ham bhī dast-e-qudrat meñ misāl-e-jām haiñ

aur giraftār-e-balā-e-gardish-e-ayyām haiñ

jaam vo mash.hūr hai jo zindagī ke naam se

jo bharā hai shīr-e-rāhat se mai-e-ālām se

ek din is haath se bhī chhūT kar rah jā.egā

is kaTore kī tarah jo TuuT kar rah jā.egā

gir gaya ye dudh ka paimana mere hath se

ho gai ek laghzish-e-mastana mere hath se

yun zamin par ja gira hathon se mere chhuT kar

gir paDe gardun se jaise koi tara TuT kar

ghash use aaya kuchh aisa kha ke chakkar gir paDa

hath se mai-KHwar ke kyun aaj saghar gir paDa

shaKH-e-gul se farsh par bulbul taDap kar gir gai

ye gira niche ki mujh se chashm-e-saqi phir gai

jis tarah sine ke andar qalb-e-muztar be-qarar

ho gaya hathon mein mere ye bhi aa kar be-qarar

mere bais apni qismat ko ye aaKHir ro gaya

aai ek aawaz jhan si aur ThanDa ho gaya

us ke girne se yahan ek choT dil par aa gai

jo mujhe kuchh kah gai batla gai sikhla gai

yani hum bhi dast-e-qudrat mein misal-e-jam hain

aur giraftar-e-bala-e-gardish-e-ayyam hain

jam wo mashhur hai jo zindagi ke nam se

jo bhara hai shir-e-rahat se mai-e-alam se

ek din is hath se bhi chhuT kar rah jaega

is kaTore ki tarah jo TuT kar rah jaega