shikast-e-saz

maiñ ne gul-rez bahāroñ kī tamannā kī thī

mujhe afsurda nigāhoñ ke sivā kuchh na milā

chand sahmī huī aahoñ ke sivā kuchh na milā

jagmagāte hue tāroñ kī tamannā kī thī

maiñ ne mauhūm umīdoñ kī panāheñ DhūñDīñ

shiddat-e-yās meñ mub.ham sā ishāra na milā

Dagmagāte hue qadmoñ ko sahārā na milā

haa.e kis dasht-e-balā-ḳhez meñ rāheñ DhūñDeñ

ab fusūñ-sāz bahāroñ se mujhe kyā matlab

aaj hī merī nigāhoñ meñ vo manzar tauba

maiñ ne dekhe haiñ lapakte hue nashtar tauba

ḳhuld bar-dosh nazāroñ se mujhe kyā matlab

āsmāñ nuur ke naġhmāt se ma.amūr sahī

maiñ ne ghaTtī huī chīḳhoñ ke sune haiñ nauhe

haa.e vo ashk jo palkoñ se Dhalak bhī na sake

zindagī husn-o-javānī se abhī chuur sahī

kabhī zau-pāsh sitāroñ kī tamannā thī mujhe

aaj zarroñ ko bhī maqsūd banā rakkhā hai

aaj kāñToñ ko kaleje se lagā rakkhā hai

kabhī gul-rez bahāroñ kī tamannā thī mujhe

main ne gul-rez bahaaron ki tamanna ki thi

mujhe afsurda nigahon ke siwa kuchh na mila

chand sahmi hui aahon ke siwa kuchh na mila

jagmagate hue taron ki tamanna ki thi

main ne mauhum umidon ki panahen DhunDin

shiddat-e-yas mein mubham sa ishaara na mila

Dagmagate hue qadmon ko sahaara na mila

hae kis dasht-e-bala-KHez mein rahen DhunDen

ab fusun-saz bahaaron se mujhe kya matlab

aaj hi meri nigahon mein wo manzar tauba

main ne dekhe hain lapakte hue nashtar tauba

KHuld bar-dosh nazaron se mujhe kya matlab

aasman nur ke naghmat se mamur sahi

main ne ghaTti hui chiKHon ke sune hain nauhe

hae wo ashk jo palkon se Dhalak bhi na sake

zindagi husn-o-jawani se abhi chur sahi

kabhi zau-pash sitaron ki tamanna thi mujhe

aaj zarron ko bhi maqsud bana rakkha hai

aaj kanTon ko kaleje se laga rakkha hai

kabhi gul-rez bahaaron ki tamanna thi mujhe