shikast

dīvāreñ darvāze darīche gum-sum haiñ

bāteñ karte bolte kamre gum-sum haiñ

hañstī shor machātī galiyāñ chup chup haiñ

roz chahakne vaalī chiḌiyāñ chup chup haiñ

paas paḌosī milne aanā bhuul ga.e

bartan aapas meñ Takrānā bhuul ga.e

almārī ne aa.heñ bharnā chhoḌ diyā

sandūqoñ ne shikva karnā chhoḌ diyā

miTThū ''bī-bī roTī do'' kahtā hī nahīñ

suunī sej pe dil bas meñ rahtā hī nahīñ

singer kī āvāz ko kaan taraste haiñ

ghar meñ jaise sab gūñge haiñ baste haiñ

tum kyā bichhḌe samay suhāne biit ga.e

lauT aao maiñ haarā lo tum jiit ga.e!

diwaren darwaze dariche gum-sum hain

baaten karte bolte kamre gum-sum hain

hansti shor machati galiyan chup chup hain

roz chahakne wali chiDiyan chup chup hain

pas paDosi milne aana bhul gae

bartan aapas mein Takrana bhul gae

almari ne aahen bharna chhoD diya

sanduqon ne shikwa karna chhoD diya

miTThu bi-bi roTi do kahta hi nahin

suni sej pe dil bas mein rahta hi nahin

singer ki aawaz ko kan taraste hain

ghar mein jaise sab gunge hain baste hain

tum kya bichhDe samay suhane bit gae

lauT aao main haara lo tum jit gae!