شتاب

جب رات بھیگ جاتی ہے

تو اس کا نم

کور بصر خوابوں کے سوکھے لبوں تک پہنچتا ہے

اور تشنہ کام خوابوں کا دم ٹوٹنے سے ذرا پہلے

ان کو زندگی کی نوید سناتا ہے

خواب جب موت کے دہانے سے پلٹ کر آتے ہیں

تو زندگی ان کے رگ و پے میں سرعت سے دوڑتی ہے

مہمیز شوق میں وہ اپنی بے بصری کو فراموش کیے

تیز رفتاری کی آخری ممکنہ حد کو چھوتے ہوئے

تعبیر کی منزل تک پہنچنا چاہتے ہیں

موت کا سہم ان کے اعصاب شل کیے دیتا ہے

بے بصری انہیں نظر نظر بھٹکاتی ہے

زندگی کی بے ثباتی کا خوف

دیو ہیکل جلاد کی صورت مجسم ہو کر

ان کی شاہ رگ دبوچنے کے درپے ہوتا ہے

وہ جانتے ہیں

کہ چاہ کر بھی اس گرفت سے

دیر تک اور دور تک آزاد نہیں رہ سکتے

اسی خوف کے زیر اثر

میسر وقت میں

وہ صدیوں کو لمحوں میں جی لینا چاہتے ہیں

اور لمحوں سے صدیاں کشید کرنا چاہتے ہیں