shitab

jab raat bhiig jaatī hai

to us kā nam

kor-basar ḳhvāboñ ke sūkhe laboñ tak pahuñchtā hai

aur tishna-kām ḳhvāboñ kā dam TūTne se zarā pahle

un ko zindagī kī naved sunātā hai

ḳhvāb jab maut ke dahāne se palaT kar aate haiñ

to zindagī un ke rag-o-pai meñ sur.at se dauḌtī hai

mahmez-e-shauq meñ vo apnī be-basarī ko farāmosh kiye

tez-raftārī kī āḳhirī mumkina had ko chhūte hue

ta.abīr kī manzil tak pahuñchnā chāhte haiñ

maut kā saham un ke a.asāb shal kiye detā hai

be-basarī unheñ nazar nazar bhaTkātī hai

zindagī kī be-sabātī kā ḳhauf

dev-haikal jallād kī sūrat mujassam ho kar

un kī shāh-rag dabochne ke darpe hotā hai

vo jānte haiñ

ki chaah kar bhī is giraft se

der tak aur duur tak āzād nahīñ rah sakte

usī ḳhauf ke zer-e-asar

mayassar vaqt meñ

vo sadiyoñ ko lamhoñ meñ jī lenā chāhte haiñ

aur lamhoñ se sadiyāñ kashīd karnā chāhte haiñ

jab raat bhig jati hai

to us ka nam

kor-basar KHwabon ke sukhe labon tak pahunchta hai

aur tishna-kaam KHwabon ka dam TuTne se zara pahle

un ko zindagi ki nawed sunata hai

KHwab jab maut ke dahane se palaT kar aate hain

to zindagi un ke rag-o-pai mein surat se dauDti hai

mahmez-e-shauq mein wo apni be-basari ko faramosh kiye

tez-raftari ki aaKHiri mumkina had ko chhute hue

tabir ki manzil tak pahunchna chahte hain

maut ka saham un ke aasab shal kiye deta hai

be-basari unhen nazar nazar bhaTkati hai

zindagi ki be-sabaati ka KHauf

dew-haikal jallad ki surat mujassam ho kar

un ki shah-rag dabochne ke darpe hota hai

wo jaante hain

ki chah kar bhi is giraft se

der tak aur dur tak aazad nahin rah sakte

usi KHauf ke zer-e-asar

mayassar waqt mein

wo sadiyon ko lamhon mein ji lena chahte hain

aur lamhon se sadiyan kashid karna chahte hain