shoala-e-tarab

rone kī umr hai na sisakne kī umr hai

jām-e-nashāt ban ke chhalakne kī umr hai

shabnam kī buuñd pī ke chaTakne kī umr hai

gulshan meñ phuul ban ke mahakne kī umr hai

sad-marhabā ye gumrahī-e-shauq chashm-o-dil

haañ rāh-e-ārzū meñ bhaTakne kī umr hai

ik jurm hai ḳhayāl-o-tasavvur gunāh kā

ye umr sirf pī ke bahakne kī umr hai

dīvāna ban ke najd ke sahrā meñ ghūmiye

lailā kī justujū meñ bhaTakne kī umr hai

bechain kyuuñ ho ruuh kisī ek ke liye

har māh-vash pe jaan chhiḌakne kī umr hai

is daur-e-imbisāt meñ ba-hālat-e-junūñ

har kū-e-dilbarāñ meñ bhaTakne kī umr hai

lāzim nahīñ ki ḳhud ko bachātā phirūñ tamām

shīsha huuñ choT khā ke darakne kī umr hai

taskīñ vo de rahī haiñ par ai qalb-e-nā-subūr

tū aur bhī dhaḌak ki dhaḌakne kī umr hai

jab chal paḌā huuñ ghar se to manzil kī shart kyā

huuñ rah-navard-e-shauq bhaTakne kī umr hai

huuñ āftāb-e-tāza huā huuñ abhī tulūa

apne jahān-e-nau meñ chamakne kī umr hai

aivān o taḳht-o-tāj haiñ merī lapeT meñ

sho.ala huuñ maiñ ye mere bhaḌakne kī umr hai

'daurāñ' maiñ bazm-e-dost meñ chheḌūñ na kyuuñ ġhazal

ye zamzame ke din haiñ lahakne kī umr hai

rone ki umr hai na sisakne ki umr hai

jam-e-nashat ban ke chhalakne ki umr hai

shabnam ki bund pi ke chaTakne ki umr hai

gulshan mein phul ban ke mahakne ki umr hai

sad-marhaba ye gumrahi-e-shauq chashm-o-dil

han rah-e-arzu mein bhaTakne ki umr hai

ek jurm hai KHayal-o-tasawwur gunah ka

ye umr sirf pi ke bahakne ki umr hai

diwana ban ke najd ke sahra mein ghumiye

laila ki justuju mein bhaTakne ki umr hai

bechain kyun ho ruh kisi ek ke liye

har mah-wash pe jaan chhiDakne ki umr hai

is daur-e-imbisat mein ba-haalat-e-junun

har ku-e-dilbaran mein bhaTakne ki umr hai

lazim nahin ki KHud ko bachata phirun tamam

shisha hun choT kha ke darakne ki umr hai

taskin wo de rahi hain par ai qalb-e-na-subur

tu aur bhi dhaDak ki dhaDakne ki umr hai

jab chal paDa hun ghar se to manzil ki shart kya

hun rah-naward-e-shauq bhaTakne ki umr hai

hun aaftab-e-taza hua hun abhi tulua

apne jahan-e-nau mein chamakne ki umr hai

aiwan o taKHt-o-taj hain meri lapeT mein

shoala hun main ye mere bhaDakne ki umr hai

'dauran' main bazm-e-dost mein chheDun na kyun ghazal

ye zamzame ke din hain lahakne ki umr hai