shor-e-barbat-o-nai

pahlī āvāz

ab sa.ī kā imkāñ aur nahīñ parvāz kā mazmūñ ho bhī chukā

tāroñ pe kamandeñ pheñk chuke mahtāb pe shab-ḳhūñ ho bhī chukā

ab aur kisī fardā ke liye un āñkhoñ se kyā paimāñ kiije

kis ḳhvāb ke jhūTe afsūñ se taskīn-e-dil-e-nādāñ kiije

shīrīnī-e-lab ḳhushbū-e-dahan ab shauq kā unvāñ koī nahīñ

shādābī-e-dil tafrīh-e-nazar ab ziist kā darmāñ koī nahīñ

jiine ke fasāne rahne do ab in meñ ulajh kar kyā leñge

ik maut kā dhandā baaqī hai jab chāheñge nipTā leñge

ye terā kafan vo merā kafan ye merī lahad vo terī hai

dūsrī āvāz

hastī kī matā-e-be-pāyāñ jāgīr tirī hai na merī hai

is bazm meñ apnī mish.al-e-dil bismil hai to kyā raḳhshāñ hai to kyā

ye bazm charāġhāñ rahtī hai ik taaq agar vīrāñ hai to kyā

afsurda haiñ gar ayyām tire badlā nahīñ maslak-e-shām-o-sahar

Thahre nahīñ mausam-e-gul ke qadam qaa.em hai jamāl-e-shams-o-qamar

ābād hai vādī-e-kākul-o-lab shādāb-o-hasīñ gulgasht-e-nazar

maqsūm hai lazzat-e-dard-e-jigar maujūd hai nemat-e-dīda-e-tar

is dīda-e-tar kā shukr karo is zauq-e-nazar kā shukr karo

is shaam o sahar kā shukr karo in shams o qamar kā shukr karo

pahlī āvāz

gar hai yahī maslak-e-shams-o-qamar in shams-o-qamar kā kyā hogā

ra.anā.ī-e-shab kā kyā hogā andāz-e-sahar kā kyā hogā

jab ḳhūn-e-jigar barfāb banā jab āñkheñ āhan-posh huiiñ

is dīda-e-tar kā kyā hogā is zauq-e-nazar kā kyā hogā

jab sher ke ḳheme raakh hue naġhmoñ kī tanābeñ TuuT ga.iiñ

ye saaz kahāñ sar phoḌeñge is kilk-e-guhar kā kyā hogā

jab kunj-e-qafas maskan Thahrā aur jaib-o-garebāñ tauq-o-rasan

aa.e ki na aa.e mausam-e-gul is dard-e-jigar kā kyā hogā

dūsrī āvāz

ye haath salāmat haiñ jab tak is ḳhuuñ meñ harārat hai jab tak

is dil meñ sadāqat hai jab tak is nutq meñ tāqat hai jab tak

in tauq-o-salāsil ko ham tum sikhlāeñge shorish-e-barbat-o-nai

vo shorish jis ke aage zubūñ hañgāma-e-tabl-e-qaisar-o-kai

āzād haiñ apne fikr o amal bharpūr ḳhazīna himmat kā

ik umar hai apnī har saa.at imroz hai apnā har fardā

ye shām-o-sahar ye shams-o-qamar ye aḳhtar-o-kaukab apne haiñ

ye lauh-o-qalam ye tabl-o-alam ye māl-o-hasham sab apne haiñ

pahli aawaz

ab sai ka imkan aur nahin parwaz ka mazmun ho bhi chuka

taron pe kamanden phenk chuke mahtab pe shab-KHun ho bhi chuka

ab aur kisi farda ke liye un aankhon se kya paiman kije

kis KHwab ke jhuTe afsun se taskin-e-dil-e-nadan kije

shirini-e-lab KHushbu-e-dahan ab shauq ka unwan koi nahin

shadabi-e-dil tafrih-e-nazar ab zist ka darman koi nahin

jine ke fasane rahne do ab in mein ulajh kar kya lenge

ek maut ka dhanda baqi hai jab chahenge nipTa lenge

ye tera kafan wo mera kafan ye meri lahad wo teri hai

dusri aawaz

hasti ki mata-e-be-payan jagir teri hai na meri hai

is bazm mein apni mishal-e-dil bismil hai to kya raKHshan hai to kya

ye bazm charaghan rahti hai ek taq agar viran hai to kya

afsurda hain gar ayyam tere badla nahin maslak-e-sham-o-sahar

Thahre nahin mausam-e-gul ke qadam qaem hai jamal-e-shams-o-qamar

aabaad hai wadi-e-kakul-o-lab shadab-o-hasin gulgasht-e-nazar

maqsum hai lazzat-e-dard-e-jigar maujud hai nemat-e-dida-e-tar

is dida-e-tar ka shukr karo is zauq-e-nazar ka shukr karo

is sham o sahar ka shukr karo in shams o qamar ka shukr karo

pahli aawaz

gar hai yahi maslak-e-shams-o-qamar in shams-o-qamar ka kya hoga

ranai-e-shab ka kya hoga andaz-e-sahar ka kya hoga

jab KHun-e-jigar barfab bana jab aankhen aahan-posh huin

is dida-e-tar ka kya hoga is zauq-e-nazar ka kya hoga

jab sher ke KHeme rakh hue naghmon ki tanaben TuT gain

ye saz kahan sar phoDenge is kilk-e-guhar ka kya hoga

jab kunj-e-qafas maskan Thahra aur jaib-o-gareban tauq-o-rasan

aae ki na aae mausam-e-gul is dard-e-jigar ka kya hoga

dusri aawaz

ye hath salamat hain jab tak is KHun mein hararat hai jab tak

is dil mein sadaqat hai jab tak is nutq mein taqat hai jab tak

in tauq-o-salasil ko hum tum sikhlaenge shorish-e-barbat-o-nai

wo shorish jis ke aage zubun hangama-e-tabl-e-qaisar-o-kai

aazad hain apne fikr o amal bharpur KHazina himmat ka

ek umar hai apni har saat imroz hai apna har farda

ye sham-o-sahar ye shams-o-qamar ye aKHtar-o-kaukab apne hain

ye lauh-o-qalam ye tabl-o-alam ye mal-o-hasham sab apne hain