shor-e-shabistan

merī paslī meñ jamā hai ka.ī shahroñ kā sukūt

jaise soyā ho kisī ġhaar meñ tahzīb kā bhuut

kū-ba-kū karb mahaktā hai badan se uḌ kar

samt-dar-samt bhaTaktī hai nazar be-maqsad

lauT aatā huuñ sar-e-shām jo ghar be-maqsad

sochtā huuñ ki maiñ ab jā.ūñ kidhar be-maqsad

hirniyāñ pyaas kī detī haiñ azaañ bistar meñ

uf ye hassās tabī'at bhī 'ajab ‘illat hai

zahr har soch kā pī jaao agar himmat hai

shor ke naag se bachne kī yahī sūrat hai

varna is naḳhl-e-ḳhamoshī ke ghane saa.e meñ

apnī pahchān banā lenā bahut mushkil hai

koī TuuTā hai yahāñ aur koī bismil hai

sab ke dāman meñ vahī hai jo mujhe hāsil hai

koh-o-sahrā se pare aur samundar se pare

kyoñ na ik shahr tilismoñ kā basā luuñ maiñ bhī

vaqt ke saath koī khel rachā luuñ maiñ bhī

apnī tanhā.ī ko dilchasp banā luuñ maiñ bhī

chhīn kar tifl-e-gadāgar se sukūñ kā ehsās

rāt-bhar chain se sotī hai siyāsat jaise

lekin is dhund meñ raushan ho basīrat jaise

jāntā ho na zamāna mirī niyyat jaise

phir bhalā kaise koī Dhoñg rachā pā.ūñgā

maiñ ki hamām se bāhar bhī barahna-tan huuñ

sard sahrā-e-tanaffus ki sulagtā ban huuñ

yā faqat apne shabistāñ ke liye īñdhan huuñ

āsmānoñ kī bulandī pe khaḌā ik ye savāl

mere chehre kī taraf dekh rahā hai dekho

meri pasli mein jama hai kai shahron ka sukut

jaise soya ho kisi ghaar mein tahzib ka bhut

ku-ba-ku karb mahakta hai badan se uD kar

samt-dar-samt bhaTakti hai nazar be-maqsad

lauT aata hun sar-e-sham jo ghar be-maqsad

sochta hun ki main ab jaun kidhar be-maqsad

hirniyan pyas ki deti hain azan bistar mein

uf ye hassas tabi'at bhi 'ajab ‘illat hai

zahr har soch ka pi jao agar himmat hai

shor ke nag se bachne ki yahi surat hai

warna is naKHl-e-KHamoshi ke ghane sae mein

apni pahchan bana lena bahut mushkil hai

koi TuTa hai yahan aur koi bismil hai

sab ke daman mein wahi hai jo mujhe hasil hai

koh-o-sahra se pare aur samundar se pare

kyon na ek shahr tilismon ka basa lun main bhi

waqt ke sath koi khel racha lun main bhi

apni tanhai ko dilchasp bana lun main bhi

chhin kar tifl-e-gadagar se sukun ka ehsas

raat-bhar chain se soti hai siyasat jaise

lekin is dhund mein raushan ho basirat jaise

jaanta ho na zamana meri niyyat jaise

phir bhala kaise koi Dhong racha paunga

main ki hamam se bahar bhi barahna-tan hun

sard sahra-e-tanaffus ki sulagta ban hun

ya faqat apne shabistan ke liye indhan hun

aasmanon ki bulandi pe khaDa ek ye sawal

mere chehre ki taraf dekh raha hai dekho