shortcut

hujūm hai

ki aag ke pahāḌ se girā huā alaav hai

koī nahīñ jo kah sake

ki ek pal ko Thahr kar batāo to

kahāñ chale ho, kis taraf

hujūm kyā hai

be-shumār muntashir akele-pan kī bhiiḌ hai

jo aap apnī āhaToñ ke Dar se laḌkhaḌā ga.ī

ġhubār-e-naqsh-e-pā uThā

to jam gayā ġhilāf-e-chashm-o-gosh par

ye qāfila bhaTak rahā hai manziloñ ko rakh ke apne dosh par

nahīñ kisī ko hosh, par

koī to ho jo kah sake

ki ''āzmīn-e-be-jihat''!

na manzileñ na rāste

to phir ġhubār ban ke uḌ rahe ho kis ke vāste

kisī ne kah diyā to kyā

nasheb meñ to tez-tar hujūm kā bahāv hai

pahāḌ ke dabāv se nasheb meñ kaTāv hai

kaTāv ke safar meñ kab kahāñ koī paḌāv hai

azāb-e-mushta.il meñ ab na nuuh hai na naav hai

patā hai?

nahīñ faqat alaav hai

aur aag ke pahāḌ se girā huā alaav hai

hujum hai

ki aag ke pahaD se gira hua alaw hai

koi nahin jo kah sake

ki ek pal ko Thahr kar batao to

kahan chale ho, kis taraf

hujum kya hai

be-shumar muntashir akele-pan ki bhiD hai

jo aap apni aahaTon ke Dar se laDkhaDa gai

ghubar-e-naqsh-e-pa uTha

to jam gaya ghilaf-e-chashm-o-gosh par

ye qafila bhaTak raha hai manzilon ko rakh ke apne dosh par

nahin kisi ko hosh, par

koi to ho jo kah sake

ki aazmin-e-be-jihat!

na manzilen na raste

to phir ghubar ban ke uD rahe ho kis ke waste

kisi ne kah diya to kya

nasheb mein to tez-tar hujum ka bahaw hai

pahaD ke dabaw se nasheb mein kaTaw hai

kaTaw ke safar mein kab kahan koi paDaw hai

azab-e-mushtail mein ab na nuh hai na naw hai

pata hai?

nahin faqat alaw hai

aur aag ke pahaD se gira hua alaw hai