shri-kirishna

ye vo shab hai jo nasīhat hai zamāne ke liye

ye vo shab hai jo 'ibādat hai zamāne ke liye

ye vo shab hai jo masarrat hai zamāne ke liye

ye vo shab hai jo ġhanīmat hai zamāne ke liye

aaj kī raat siyah baḳht hamārā chamkā

aaj kī raat umīdoñ kā sitārā chamkā

raat bhādoñ kī añdheroñ thī ghaTā chhā.ī thī

muzhda-e-aish-o-ḳhushī saath lagā laa.ī thī

khilne vaalī kalī dil kī nahīñ murjhā.ī thī

kans kī maut isī parde meñ chhup aa.ī thī

liyā mathurā meñ janam jā ke rahā gokul meñ

paaoñ ke rakhte hī amrit milā jamunā-jal meñ

vo kanhayyā vo mire dil kā lubhāne vaalā

vo zamāne meñ na.e ruup se aane vaalā

vo bhajan naġhma-e-ilhām batāne vaalā

vo baḌe prem se bansī kā bajāne vaalā

jalva-e-nūr-e-azal ‘ālam-e-tanvīr meñ thā

yā'nī jo kuchh bhī thā bas ḳhaak kī tā'mīr meñ thā

vo nazar hī nahīñ jis ko nahīñ hasrat us kī

dil vo kyā dil hai nahīñ jis ko mohabbat us kī

khul ga.ī dīda-e-bīnā pe haqīqat us kī

ek ik shai meñ nazar aatī hai sūrat us kī

shāhid-e-mā’nī-e-asrār-e-zuhūr-e-qudrat

sab pe raushan thā ki vo ḳhaas thā nūr-e-qudrat

nand ke laal jasoda ke dulāre mohan

sab ke bigḌe hue sab kaam sañvāre mohan

is taraf bhī nigah-e-lutf ho pyāre mohan

kuchh hamārī bhī suno aa ke hamāre mohan

ho ga.ī zer-o-zabar dekh lo duniyā dil kī

dil hī dil meñ rahī jaatī hai tamannā dil kī

dab ga.e miT ga.e maġhrūr ubharne vaale

naam sun sun ke tirā Darte the Darne vaale

hasrat-e-jaur meñ marte rahe marne vaale

zulm ko bhuul ga.e zulm ke karne vaale

uTh ga.ī chashm-e-ġhazab kans kī hastī na rahī

ḳhud-parastī na rahī qahr-parastī na rahī

gyaan kī raah zamāne ko dikhā.ī tū ne

prem kyā chiiz hai ye baat batā.ī tū ne

ġham bhī tujh ko mile taklīf bhī paa.ī tū ne

duur dukh ho gayā murlī jo bajā.ī tū ne

ik na.ī tarz na.ī aan se bolī bansī

taT pe jamunā ke 'ajab shaan se bolī bansī

kis qayāmat kā bharā soz tire saaz meñ hai

rang-e-ulfat bhī nihāñ ḳhūbī-e-andāz meñ hai

ye baḌe josh meñ hai aur baḌe naaz meñ hai

goyā jaadū isī jādū-bharī āvāz meñ hai

raag ke vaqt koī dhun meñ koī lai meñ hai mast

dekhtā huuñ jise achchhī tarah vo nai meñ hai mast

apnī quvvat ko baḌe josh meñ laane vaalā

uñgliyoñ par vo govardhan ko nachāne vaalā

vo sudāmā kī ġharībī kā miTāne vaalā

kaam sankaT meñ har ik shaḳhs ke aane vaalā

ab bhī āfāq ke lab par hai fasāna terā

yaad hai yaad zamāne ko zamāna terā

tere hote na koī dar-pa.e-āzār rahā

tere hote na jafā-kār jafākār rahā

bekasoñ ke liye har haal meñ ġham-ḳhvār rahā

dharm ke vāste arjun kā madad-gār rahā

kaurvoñ kā vo ġhurūr aur nishāñ tak na bachā

ran meñ sab qatl hue ek javāñ tak na bachā

na huā hai na koī hogā tirā saanī bhī

aisā yogī bhī kahīñ aisā kahīñ gyānī bhī

daan ko sun ke chhupe sharm se sab daanī bhī

miT ga.ī dam se tire shān-e-sitam-rānī bhī

ġhaur se dekheñ zarā log tamāshā kyā hai

tū ne giitā meñ batāyā hai ki duniyā kyā hai

kilk-e-qudarat se hai insān kī taqdīr banī

ḳhaak ke zarroñ se hai ḳhaak kī tasvīr banī

qābil-e-dīd har ik shakl kī tahrīr banī

rishta-e-tār-e-nafas kī na.ī zanjīr banī

aag hai ḳhaak hai paanī hai havā shāmil hai

chaar 'unsur na hoñ to ziist bahut mushkil hai

ye samajhte nahīñ kam-'aql ubharne vaale

ki bigaḌ jā.eñge ik roz sañvarne vaale

kaam karne ke jo haiñ kar leñ vo karne vaale

jiine vaale nahīñ āḳhir ko haiñ marne vaale

kyuuñ miTe jaate haiñ dil apnā lagāne ke liye

aa.e haiñ dahr meñ sab dahr se jaane ke liye

zindagī kyā hai khulī is kī haqīqat kaisī

maut kyā chiiz hai kī tū ne nasīhat kaisī

desh ke vāste be-lāg thī ulfat kaisī

tere hī dam se huī dharm kī 'izzat kaisī

dharm kā aaj kahīñ zikr nahīñ naam nahīñ

kyuuñ na andher ho maujūd yahāñ shyām nahīñ

aa jā aa jā idhar ai nand dulāre aa jā

phir vo bansī liye jamunā ke kināre aa jā

parda-e-ġhaib se ho jaa.eñ ishāre aa jā

ab nahīñ taab ġham-e-hijr kī pyāre aa jā

aa kanhayyā ki tire vāste ham 'bismil' haiñ

kahne sunñe ke liye dil hai magar be-dil haiñ

ye wo shab hai jo nasihat hai zamane ke liye

ye wo shab hai jo 'ibaadat hai zamane ke liye

ye wo shab hai jo masarrat hai zamane ke liye

ye wo shab hai jo ghanimat hai zamane ke liye

aaj ki raat siyah baKHt hamara chamka

aaj ki raat umidon ka sitara chamka

raat bhadon ki andheron thi ghaTa chhai thi

muzhda-e-aish-o-KHushi sath laga lai thi

khilne wali kali dil ki nahin murjhai thi

kans ki maut isi parde mein chhup aai thi

liya mathura mein janam ja ke raha gokul mein

paon ke rakhte hi amrit mila jamuna-jal mein

wo kanhayya wo mere dil ka lubhane wala

wo zamane mein nae rup se aane wala

wo bhajan naghma-e-ilham batane wala

wo baDe prem se bansi ka bajaane wala

jalwa-e-nur-e-azal ‘alam-e-tanwir mein tha

ya'ni jo kuchh bhi tha bas KHak ki ta'mir mein tha

wo nazar hi nahin jis ko nahin hasrat us ki

dil wo kya dil hai nahin jis ko mohabbat us ki

khul gai dida-e-bina pe haqiqat us ki

ek ek shai mein nazar aati hai surat us ki

shahid-e-ma’ni-e-asrar-e-zuhur-e-qudrat

sab pe raushan tha ki wo KHas tha nur-e-qudrat

nand ke lal jasoda ke dulare mohan

sab ke bigDe hue sab kaam sanware mohan

is taraf bhi nigah-e-lutf ho pyare mohan

kuchh hamari bhi suno aa ke hamare mohan

ho gai zer-o-zabar dekh lo duniya dil ki

dil hi dil mein rahi jati hai tamanna dil ki

dab gae miT gae maghrur ubharne wale

nam sun sun ke tera Darte the Darne wale

hasrat-e-jaur mein marte rahe marne wale

zulm ko bhul gae zulm ke karne wale

uTh gai chashm-e-ghazab kans ki hasti na rahi

KHud-parasti na rahi qahr-parasti na rahi

gyan ki rah zamane ko dikhai tu ne

prem kya chiz hai ye baat batai tu ne

gham bhi tujh ko mile taklif bhi pai tu ne

dur dukh ho gaya murli jo bajai tu ne

ek nai tarz nai aan se boli bansi

taT pe jamuna ke 'ajab shan se boli bansi

kis qayamat ka bhara soz tere saz mein hai

rang-e-ulfat bhi nihan KHubi-e-andaz mein hai

ye baDe josh mein hai aur baDe naz mein hai

goya jadu isi jadu-bhari aawaz mein hai

rag ke waqt koi dhun mein koi lai mein hai mast

dekhta hun jise achchhi tarah wo nai mein hai mast

apni quwwat ko baDe josh mein lane wala

ungliyon par wo gowardhan ko nachane wala

wo sudama ki gharibi ka miTane wala

kaam sankaT mein har ek shaKHs ke aane wala

ab bhi aafaq ke lab par hai fasana tera

yaad hai yaad zamane ko zamana tera

tere hote na koi dar-pae-azar raha

tere hote na jafa-kar jafakar raha

bekason ke liye har haal mein gham-KHwar raha

dharm ke waste arjun ka madad-gar raha

kaurwon ka wo ghurur aur nishan tak na bacha

ran mein sab qatl hue ek jawan tak na bacha

na hua hai na koi hoga tera sani bhi

aisa yogi bhi kahin aisa kahin gyani bhi

dan ko sun ke chhupe sharm se sab dani bhi

miT gai dam se tere shan-e-sitam-rani bhi

ghaur se dekhen zara log tamasha kya hai

tu ne gita mein bataya hai ki duniya kya hai

kilk-e-qudarat se hai insan ki taqdir bani

KHak ke zarron se hai KHak ki taswir bani

qabil-e-did har ek shakl ki tahrir bani

rishta-e-tar-e-nafas ki nai zanjir bani

aag hai KHak hai pani hai hawa shamil hai

chaar 'unsur na hon to zist bahut mushkil hai

ye samajhte nahin kam-'aql ubharne wale

ki bigaD jaenge ek roz sanwarne wale

kaam karne ke jo hain kar len wo karne wale

jine wale nahin aaKHir ko hain marne wale

kyun miTe jate hain dil apna lagane ke liye

aae hain dahr mein sab dahr se jaane ke liye

zindagi kya hai khuli is ki haqiqat kaisi

maut kya chiz hai ki tu ne nasihat kaisi

desh ke waste be-lag thi ulfat kaisi

tere hi dam se hui dharm ki 'izzat kaisi

dharm ka aaj kahin zikr nahin nam nahin

kyun na andher ho maujud yahan shyam nahin

aa ja aa ja idhar ai nand dulare aa ja

phir wo bansi liye jamuna ke kinare aa ja

parda-e-ghaib se ho jaen ishaare aa ja

ab nahin tab gham-e-hijr ki pyare aa ja

aa kanhayya ki tere waste hum 'bismil' hain

kahne sunne ke liye dil hai magar be-dil hain