shua-e-id

chand lamhāt ki har saal chale aate haiñ

jaise sahrā meñ gulāboñ kī mahak aa jaa.e

jaise zulmat meñ ujāloñ kī khanak aa jaa.e

jaise aa jaa.e tasavvur meñ koī zohra-jabīñ

jaise tārīk fazāoñ meñ sitāroñ kā jamāl

jaise ik dard bhare dil meñ masarrat kā ḳhayāl

jaise bichhḌe hue hamrāz ke milne kā yaqīñ

jaise tālāb ke siine pe khile koī kañval

jaise ho niiñd ke raste meñ koī ḳhvāb-mahal

jaise fankār ke taḳh.īl meñ ik nafs hasīñ

jaise phūloñ ke laboñ par ho tabassum kī lakīr

jaise ik din ko shahanshāh faqīr ibn-e-faqīr

jaise aa jaa.e sar-e-bām koī parda-nashīñ

jaise sangīt pe naġhmoñ kī sisaktī lahreñ

jaise hoñ shaam ke dāman meñ shafaq kī lahreñ

jaise be-rañg fasāne meñ koī lafz-e-hasīñ

jaise peshānī-e-mashriq pe ho sub.h-e-kāzib

jaise tārīk ḳhalāoñ meñ shahāb-e-sāqib

jaise bhūle se chalā aa.e koī dil ke qarīñ

kitnī sadiyoñ se bahar-hāl chale aate haiñ

chand lamhāt jinheñ iid kahā jaatā hai

chand lamhat ki har sal chale aate hain

jaise sahra mein gulabon ki mahak aa jae

jaise zulmat mein ujalon ki khanak aa jae

jaise aa jae tasawwur mein koi zohra-jabin

jaise tarik fazaon mein sitaron ka jamal

jaise ek dard bhare dil mein masarrat ka KHayal

jaise bichhDe hue hamraaz ke milne ka yaqin

jaise talab ke sine pe khile koi kanwal

jaise ho nind ke raste mein koi KHwab-mahal

jaise fankar ke taKHil mein ek nafs hasin

jaise phulon ke labon par ho tabassum ki lakir

jaise ek din ko shahanshah faqir ibn-e-faqir

jaise aa jae sar-e-baam koi parda-nashin

jaise sangit pe naghmon ki sisakti lahren

jaise hon sham ke daman mein shafaq ki lahren

jaise be-rang fasane mein koi lafz-e-hasin

jaise peshani-e-mashriq pe ho subh-e-kazib

jaise tarik KHalaon mein shahab-e-saqib

jaise bhule se chala aae koi dil ke qarin

kitni sadiyon se bahar-haal chale aate hain

chand lamhat jinhen id kaha jata hai